ევროპული საქართველოს პოლიტიკური საბჭოს წევრის, გიგი წერეთლის განცხადებით, კრისტიან დანიელსონის მეორედ ჩამოსვლა ოპოზიციასა და ხელისუფლებას შორის შეთანხმების მიღწევის გაცილებით მეტი იმედი გააჩინა. მისივე თქმით, ახლა კომპრომისებზე წასვლაა მნიშვნელოვანი.

"დანიელსონის მეორედ ჩამოსვლამ გაცილებით უფრო მეტი იმედი გააჩინა იმისა, რომ შეთანხმება მოხდეს. კომპრომისი პოლიტიკაში არ წარმოადგენს ნამდვილად სისუსტის ნიშანს და ეს პირველად არ მოგვისმენია. საჭირო დროს საჭირო კომპრომისები უნდა გაკეთდეს. ამ შემთხვევაში ეს, პირველ რიგში, უნდა ესმოდეს ქართულ ოცნებას, რომელიც ჯიუტად აცხადებს, რომ არის საკითხები, რომელზეც ის არ ისაუბრებს. ეს არის სწორედ მთავარი საკითხები, რაც პოლიტპატიმრებისა და ვადამდელ არჩევნებს ეხება", — განაცხადა წერეთელმა.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის პოლიტიკურ პარტიებთან შეხვედრებს ორშაბათიდან, 29 მარტიდან დაიწყებს.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.