ჯანდაცვის მინისტრის, ეკატერინე ტიკარაძის თქმით, კლინიკაში, სადაც მეგი ბაქრაძე მუშაობდა, ვაქცინაციის პროცესი კვლავაც გაგრძელდება. როგორც ტიკარაძე განმარტავს, იმედის კლინიკაში არის 6-საწოლიანი რეანიმაციული განყოფილება, ამიტომ, ვაქცინის გაკეთება იქ აქამდეც შეიძლებოდა და ახალი წესის მიხედვითაც შეიძლება.

"იმედის კლინიკას გააჩნია 6-საწოლიანი რეანიმაციული განყოფილება და ეს არ გახლავთ ისეთი სტაციონარი, სადაც ვაქცინაციის პროცესი არ შეიძლებოდა ყოფილიყო და იქ, ვაქცინაციის პროცესი კვლავაც გაგრძელდება", — ამბობს ტიკარაძე.

ტიკარაძე ხაზს უსვამს იმასაც, რომ ვაქცინაციის დროს, კლინიკაში რეანიმატოლოგის ყოფნა პროტოკოლით არ არის გათვალისწინებული, თუმცა მეგი ბაქრაძის გარდაცვალების შემდეგ, მაინც მიიღეს გადაწყვეტილება, პროცესი მხოლოდ მრავალპროფილურ კლინიკებში გაგრძელდეს.

"მსოფლიოს არცერთ ქვეყანაში არ დგას ვალდებულება, რომ ადგილზე იყოს რეანიმატოლოგი. შესაბამისად, საქართველოსაც, ეს ვალდებულება არ ჰქონდა.

[პროტოკოლი] ქვეყანას არ ავალდებულებს, რა თქმა უნდა, რომ მრავალპროფილურ სტაციონარებში გაგრძელდეს ვაქცინაციის პროცესი. თუმცა, გამონაკლისის სახით, ეს გადაწყვეტილება მიიღო საბჭომ", — ამბობს ტიკარაძე.

19 მარტს, ჯანდაცვის მინისტრის მოადგილემ, თამარ გაბუნიამ განაცხადა, რომ მაქსიმალური უსაფრთხოების უზრუნველყოფის მიზნით, ვაქცინაციის პროცესი მრავალპროფილური სტაციონარების დონეზე გაგრძელდება. ამის მიზეზად გაბუნიამ AsztaZeneca-ს ვაქცინის გაკეთების შემდეგ, ახალციხის იმედის კლინიკის ექთნის, მეგი გაბუნიას, სავარაუდოდ, ანაფილაქსიური რეაქციის შედეგად გარდაცვალება დაასახელა.

თამარ გაბუნია განმარტავს, რომ ანაფილაქსიური შემთხვევები ქვეყანაში ყოველწლიურად ფიქსირდება და აქამდე ეს კორონავირუსთან არ ყოფილა დაკავშირებული. მისი თქმით, დაფიქსირებულია ანაფილაქსიური შოკით გარდაცვალების ფაქტებიც.

როგორც ცნობილია, მეგი ბაქრაძისთვის ვაქცინის გაკეთების დროს, ახალციხის იმედის კლინიკის რეანიმატოლოგი ადგილზე არ იმყოფებოდა. იგი კლინიკაში რამდენიმე წუთის შემდეგ მივიდა. ჯანდაცვის მინისტრის მოადგილე, თამარ გაბუნიამ განაცხადა, რომ ბაქრაძის მკურნალობის პროცესში არც ერთი წუთი არ დაკარგულა.

გაიგეთ მეტი: