დედამიწის შემსწავლელ მეცნიერებათა ინსტიტუტის სეისმოლოგი, თეა გოდოლაძე ამბობს, რომ მაჭავარიანის ქუჩაზე მეწყრულ ფერდობზე მას და მის გუნდს არ უშვებენ. აქამდე მან ფერდობზე შედიოდა და ადგილიდან ჩართვებიც ჰქონდა.

"ჩემზე გაბრაზებული ყოფილა მერია, რატო გვლანძღავსო და ტერიტორიაზე არ მიშვებენ. შენ გენაცვალე ჩემო ქვეყანავ. მეცნიერი ვარ მე!" — წერს გოდოლაძე ფეისბუქზე.

აღნიშნულთან დაკავშირებით On.ge თბილისის მერიას დაუკავშირდა, სადაც აღნიშნავენ, რომ შექმნილია სამუშაო ჯგუფი, რომელიც 24-საათიან რეჟიმში ახორციელებს მონიტორინგს და აწარმოებს კვლევას. რაც შეეხება გარე პირებს, მათი ადგილზე ყოფნა შეზღუდულია უსაფრთხოების ზომებიდან გამომდინარე.

"ნებისმიერ სიახლეს და კვლევასთან დაკავშირებულ ინფორმაციას თბილისის მერია გაავრცელებს ოპერატიულად", — აცხადებენ მერიაში.

ვაშლიჯვრისა და ნუცუბიძის დამაკავშირებელ გზაზე მეწყერი ჩამოწვა. ამის ამსახველი ფოტოები 17 მარტს ფორუმზე გავრცელდა. მეწყერზე 17 მარტს ისაუბრა თბილისის მერმა, კახა კალაძემაც. მისი თქმით, აღნიშნულ ტერიტორიაზე განხორციელებული სხვადასხვა აქტივობის გამო, დროებით სტაბილიზაციაში მყოფ ძველ მეწყრულ არეალში მეორადი გენერაციის მეწყერი განვითარდა. კალაძის განცხადებით, მოქალაქეთა უსაფრთხოების მიზნით, ტრანსპორტის მოძრაობა დროებით ორმხრივად შეიზღუდა.

სპეციალისტები ამბობენ, რომ პრობლემა სერიოზულია და საუბარია ნახევარი მილიონი კუბური მეტრის მასაზე, რომლის შეჩერება შეუძლებელია. ამასთან, მერიაში აცხადებენ, რომ მოსახლეობას საფრთხე არ ემუქრება.

გაიგეთ მეტი: