ევროპული საქართველოს ლიდერის, გიგა ბოკერიას განცხადებით, დღევანდელი მოლაპარაკებების შემდეგ ქართულ ოცნებაზე წნეხი უნდა გაძლიერდეს და ქვეყნის შიგნით აქციები უნდა გაგრძელდეს.

როგორც ბოკერია ამბობს, "ამ ფაზაში" მმართველ გუნდთან საუბარი დასრულებულია. მისივე თქმით, ვერც ერთ საკითხზე შედეგს ვერ მიაღწიეს, ორ საკითხზე კი — პოლიტპატიმრებსა და ვადამდელ არჩევნებზე — განხილვები არც ყოფილა.

"გვჭირდება ორი რამის გაგრძელება. იმისა, რაც დღევანდელი შევხედრის შემდეგ ნებისმიერ შემთხვევაში გაფართოვდება, ვგულისხმობ საერთაშორისო თანამეგობრობის და ევროკავშირის მხარდაჭერას დემოკრატიის მიმართ, რაც გულისხმობს წნეხს და ქვეყნის შიგნით დაგეგმილი, მშვიოდობიანი, მაგრამ მწვავე აქციების", — აღნიშნა ბოკერიამ.

ოპოზიციისა და მმართველი გუნდის შეხვედრა ევროპული საბჭოს პრეზიდენტის წარმომადგენელთან, კრისტიან დანიელსონთან 10 საათი გაგრძელდა, თუმცა უშედეგოდ დასრულდა — შეთანხმება არ შედგა. დანიელსონის განცხადებით, შეხვედრაზე იყო მნიშვნელოვანი პროგრესი პრეზიდენტ მიშელის დატოვებულ 6-პუნქტიან გეგმის ირგვლივ ზოგიერთ პუნქტზე.

დანიელსონმა აღნიშნა, რომ ხვალ, 19 მარტს საქართველოს დატოვებს და ბრიუსელში დაბრუნდება. მისი თქმით, შარლ მიშელს მოლაპარაკების დეტალებს მოახსენებს.

დანიელსონის შემდეგ ბრიფინგზე ოპოზიციის და მმართველი გუნდის ლიდერები გამოვიდნენ. ამჯერადაც მათ შეთანხმების ვერმიღწევაში ერთმანეთი დაადანაშაულეს. აღსანიშნია ისიც, რომ ოპოზიცია ამ მოვლენების უკან ბიძინა ივანიშვილის ხელს ხედავდა, მმართველი გუნდი კი მიხეილ სააკაშვილისას.

ამავე თემაზე: