გირჩი — მეტი თავისუფლების ლიდერის, ზურაბ ჯაფარიძის განცხადებით, ქათული ოცნების თავმჯდომარეს, ირალი კობახიძეს დავალება აქვს, რომ მოლაპარაკებები ჩაშალოს. ასე გამოეხმაურა ის იმ ფაქტს, რომ შეხვედრის შემდეგ კობახიძემ ოპოზიცია ისევ გააკრიტიკა.

"მოლაპარაკებას აქვს 2 პირობა ჩვენთან და დარწმუნებული ვარ, რომ იგივე პირობა აქვს ქართულ ოცნებასთანაც — ერთი არის, რომ შინაარსი გარეთ არ გამოვიტანოთ და მეორე, რომ რამენაირად თავი შევიკავოთ ერთმანეთის გინებისგან. თალაკვაძემ გუშინ ეგ პირობა დაიცვა და ეტყობოდა, რომ მოზომილი და ადეკვატური იყო. კობახიძემ მგონია, რომ დავალება აქვს ჩემი აზრით, იმიტომ, რომ არ მჯერა, რომ თვითშემოქმედებას ეწევა, რომ ჩაშალოს ამბავი", — განაცხადა მან TV პირველის ეთერში.

დანიელსონთან ქართული ოცნებისა და ოპოზიციის შეხვედრები 14 მარტს უშედეგოდ დასრულდა, რის გამოც შარლ მიშელის წარმომადგენელმა თბილისში ვიზიტი ერთი დღით გადადო.

დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: