მართლმადიდებელი ეკლესიის საპატრიარქო აცხადებს, რომ გირჩის ბიბლიური თავისუფლების წევრებმა "შენდობისა" და "სინანულის" წერილები უნდა დაწერონ იმისთვის, რომ "ეკლესიაში დაბრუნება" შეძლონ. გარდა ამისა, მათი "გულწრფელი სინანული" მღვდელმთავარმა უნდა დაადასტუროს, რომელიც გასცემს რეკომენდაციას ეპისკოპოსთან წარსადგენად. წინააღმდეგ შემთხვევაში საპატრიარქო მათ ჯვრისწერისა და ნათლობის უფლებას არ აძლევს და წესის აგებაზეც უარს ეუბნება.

"მღვდელმსახურმა ე.წ. "სინანულის ფურცელზე" მას ხელმოწერით უნდა დაადასტურებინოს საკუთარი გადაწყვეტილება, ხოლო შემდეგ წაუკითხოს შენდობის ლოცვა და მის სახელზე ინდივიდუალურად გასცეს ე.წ. "შენდობის ფურცელი" პირადი ხელმოწერითა და ბეჭდით. აღნიშნული პროცედურის შემდეგ ასეთი პირი კვლავ ჩაითვლება მართლმადიდებელი ეკლესიის წევრად", — აცხადებენ საპატრიარქოში.

გარდა ამისა, აქვეყნებენ "სინანულისა" და "შენდობის" ფურცლების ნიმუშებს, რომელშიც წერია, რომ ხელმომწერი "აცნობიერებს დანაშაულს" და სურს დაუბრუნდეს "ეკლესიის წიაღს".

სინოდის ბოლო განჩინებით, საპატრიარქო დაუპირისპირდა გირჩის ბიბლიურ თავისუფლებას, რომელიც გასცემს სასულიერო პირის მოწმობებს სავალდებულო სამხედრო სამსახურისთვის თავის ასარიდებლად. საპატრიარქო დაიმუქრა, რომ ამ ორგანიზაციაში გაწევრიანებულ სასულიერო პირის სტატუსის მქონე პირებს ქრისტიანულ რიტუალებში მონაწილეობის უფლებას არ მისცემდნენ.

"შევნიშნავთ, რომ მონანიების გარეშე, გარდაცვალების შემთხვევაში, მათზე ვერც წესის აგება შესრულდება და მათ სახელებს ღვსმსახურებისას ეკლესია ვერ მოიხსენიებს, რადგან, ნებსით თუ უნებლიედ, თვითონ განუდგნენ მას", — წერდა სინოდი განჩინებაში.

ბიბლიური თავისუფლების მთავარი მღვდელმსახურის, ლევან ჯგერენაიას თქმით, მათი მღვდელმსახურებისთვის მართლმადიდებლურ რიტუალებში მონაწილეობის აკრძალვით სინოდმა დაადასტურა, რომ ბიბლიური თავისუფლება მართლაც რელიგიური გაერთიანებაა.

"ჩვენს მღვდელმსახურებს აშინებდნენ იმით, რომ ეს არ არის რელიგიური ორგანიზაცია და ახლა ჯარში წაგიყვანთ იძულებით. ამ მექანიზმს ბიუროკრატები ვეღარ გამოიყენებენ. ამ თვალსაზრისით, სინოდი, პრინციპში, ადასტურებს, რომ ჩვენ ვართ, მართლაც, რელიგიური გაერთიანება", — განაცხადა ლევან ჯგერენაიამ.