ევროპული საბჭოს პრეზიდენტის წარმომადგენლის, კრისტიან დანიელსონის განცხადებით, დროა პოლიტიკურმა მხარეებმა ყველა ძალა იხმარონ პოლიტიკური ჩიხიდან გამოსავლის მოსაძებნად.

"ევროკავშირისთვის საქართველო ძალიან მნიშვნელოვანია და ევროკავშირი დიდ ყურადღებას ამახვილებს საქართველოზე. აქ რაც ხდება მნიშვნელოვანია ევროკავშირისთვის. ჩვენი მხრიდან არის შეშფოთება იმასთან დაკავშირებით, რომ ქვეყანა პოლიტიკურ ჩიხშია შესული. ძალიან ბევრი გამოწვევაა, სამწუხაროდ, რომელიც ეხება პანდემიას, ეკონომიკურ სიტუაციას. ამიტომ ჩვენ გვჯერა, რომ ახლა დროა პოლიტიკური მხარეებისთვის, ყველა ძალა იხმარონ, რომ ამ ჩიხიდან გამოსავალი იპოვონ. მინდა ხაზგასმით აღვნიშნო, რომ ჩემმი, ისევე, როგორც ბატონი ჰარცელისა და ელჩი დეგნანის როლი არის ის, რომ ხელი შევუწყოთ ამ პროცესს", — განაცხადა დანიელსონმა.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: