პრემიერმინისტრის, ირაკლი ღარიბაშვილის განცხადებით, TV პირველის მიერ გავრცელებული აუდიოჩანაწერები ფაბრიკაციაა.

"პირველ რიგში, მე მინდა გითხრათ, რომ რა თქმა უნდა, ჩემი როგორც აღმასრულებელი ხელისუფლების მეთაურის მთავარი საზრუნავი, მთავარი საქმე არის ის, რომ ვიფიქრო ჩვენი ქვეყნის, ხალხის წინაშე არსებული გამოწვევების მოგვარებაზე. რა თქმა უნდა, ეს არის ჩემი პირდაპირი პასუხისმგებლობა და მოვალეობა. მეორე — მინდა გითხრათ, რომ არ მსურს აღნიშნული მდარე ხარისხის ბინძურ პროვოკაციებზე მიწევდეს ყოველთვის თავის მართლება და განმარტებების გაკეთება, მაგრამ ვინაიდან საზოგადოებაში გაჩნდა შეკითხვები, მხოლოდ მოსახლეობისთვის მე მინდა გავაკეთო შემდეგი განმარტება — ეს ჩანაწერები არის ფაბრიკაცია, 11 წლის წინანდელი ჩანაწერებიც. პირველი ის, რომ კიდევ ერთხელ დადასტურდა, რომ მაშინ ჩვენ ტოტალური მოსმენების მსხვერპლი და ყველას უსმენდნენ, კარგად მოგვეხსენება. მეორე ის, რომ თვითონ ჩანაწერი შედგება უამრავი საუბრებისგან, ეს არის ფაბრიკაცია ჩვეულებრივი", — განაცხადა პრემიერმინისტრმა.

ღარიბაშვილის თქმით, აუდიოჩანაწერებში ნახსენები კომუნიკაცია მინისტრებთან განპირობებული იყო მისი საქმიანობით ფონდ ქართუში.

"საუბარი იყო, მაგალითად იმაზე, თუ რატომ ახსენებდა ბერა ივანიშვილი ჩემთან საუბარში, რომ მინისტრები დამირეკავდნენ, მე მინდა განმარტება გავაკეთო მოსახლეობისთვის, ერთ-ერთი მთავარი კითხვა ეს იყო, მგონი — მოგეხსენებათ, რომ მე 8 წლის განმავლობაში ვხელმძღვანელობდი ბიძინა ივანიშვილის ფონდს, ჩვენ ვმართავდით არაერთ საქველმოქმედო პროექტს საქართველოში, ჩვენ 200-300 მილიონის პროექტები გვქონდა წლის განმავლობაში, მოგეხსენებათ 3 მილიარდი დოლარი აქვს დახარჯული ბატონ ბიძინას ამ ფონდის მეშვეობით ჩვენი ქვეყნისთვის და ბუნებრივია, მაშინ მე მიწევდა ურთიერთობა, პირდაპირი კომუნიკაცია მთავრობის უწყებებთან, მინისტრებთან მათ შორის. მე მქონდა არაერთი შეხვედრა აწ გარდაცვლილ კულტურის მინისტრთან, ბატონ რურუასთან, ბატონ კვიტაშვილთან, რომელიც ჯანდაცვის მინისტრი იყო, თბილისის მერთან, ეკონომიკის მინისტრთან, პრეზიდენტის მეუღლესთან, ქალბატონ სანდრასთან გვქონდა არაერთ პროექტზე მოლაპარაკებები და მათი თხოვნების მოსმენები გვიწევდა. პრეზიდენტი დედა, გიული ალასანია ხშირი სტუმარი იყო ჩემი, როცა მე ვიყავი ფონდის პრეზიდენტი. აქედან გამომდინარე პასუხი მარტივია — პირდაპირი კომუნიკაცია მქონდა მინისტრთა კაბინეტის წევრებთან. აქ არავითარი ლოგიკა არ არსებობს იმისა, თუ რატომ უნდა ყოფილიყო სხვანაირად აღქმული ეს საკითხი", — თქვა მან.

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე, სავარაუდოდ, იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იციანიან. ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

პროკურატურამ აღნიშნულ საქმეზე გამოძიება კერძო საუბრის უკანონო მიყურადების, ჩაწერისა და გავრცელების მუხლით დაიწყო.

უწყება არაფერს ამბობს იმაზე, დაინტერესდა თუ არა სავარაუდო ძალადობის ფაქტებით, რაზეც ჩანაწერშია საუბარი.

პროკურატურის ინფორმაციით, საქმეზე მიმდინარე გამოძიების ფარგლებში, ჩატარდება ყველა საჭირო საგამოძიებო და საპროცესო მოქმედება ჩანაწერის მოპოვების და გავრცელების კანონიერების დასადგენად.

სამი დღის შემდეგ, 9 მარტს, ბერა ივანიშვილმა განაცხადა, რომ 2011 წელს მისი ფანების მშობლებმა ბულინგის შესახებ აცნობეს და დაცვის სამსახურმა "ყველა კანონის, მორალის დაცვით მოინახულა" ისინი. ბერა ივანიშვილმა, ასევე, განაცხადა, რომ თუ ვინმე დედას შეაგინებს, აუცილებლად მოსთხოვს პასუხს დღესაც.

გაიგეთ მეტი: