საქართველოს ყოფილი პრეზიდენტის, მიხეილ სააკაშვილის განცხადებით, რიგგარეშე არჩევნებთან დაკავშირებით პლებისციტის მოდელს ოპოზიცია არ უნდა დათანმხდეს.

"ჩემი პირადი აზრია, რომ არავითარ შემთხვევაში არ შეიძლება დათანხმება პლებისციტის მოდელზე, რომელსაც თავს გვახვევს ივანიშვილი. პლებისციტის თემა არის ის თემა, რომ მას უნდა, ადგილობრივ არჩევნებთან ერთად, რომელიც რამდენიმე თვის შემდეგ არის, სადაც ის [ბიძინა ივანიშვილი] დახარჯავს ძალიან ბევრ ფულს, ბევრს მოისყიდის, ჩაატაროს პლებისციტი. რომც წააგოს ეს პლებისციტი, მერე ექნება კიდევ რამდენიმე თვე და ის აუცილებლად წააგებს პლებისციტს, იმისათვის, რომ მოისყიდოს, დააშინოს, დაიჭიროს და, რაც მთავარია, ქვეყნიდან გაყაროს ასობით ათასი ადამიანი, აქტიური ამომრჩეველი. ამასობაში ქვეყანა კარგავს კიდევ ერთ წელიწადს, მეგობრებო, და ჩვენ არ გვაქვს არცერთი დღე დასაკარგი", — განაცხადა სააკაშვილმა თავის მორიგ Facebook ვიდეომიმართვაში.

სტრატეგია აღმაშენებლის ერთ-ერთი ლიდერის, გიორგი ვაშაძის თქმით, ევროპული საბჭოს პრეზიდენტის შარლ მიშელის მხრიდან შეხვედრაზე თხოვნა იყო, რომ გარკვეულწილად კომპრომისულები ყოფილიყვნენ, რაზეც ოპოზიციის წარმომადგენლებმა განაცხადეს, რომ კომპრომისი იქნება, თუ ისინი რიგგარეშე არჩევნების მიმართ პლებისციტზე წავლენ.