ნაციონალური მოძრაობის ერთ-ერთი ლიდერი, სალომე სამადაშვილი აცხადებს, რომ პარტიის ლიდერის, ნიკა მელიასა და გიორგი რურუას გათავისუფლება არის ოპოზიციასა და ხელისუფლებას შორის მოლაპარაკებების განახლების წინაპირობა. მოლაპარაკებები კი, სამადაშვილის თქმით, რიგგარეშე არჩევნების ჩატარებაზე უნდა წარიმართოს. ეს განცხადება მან ევროპული საბჭოს პრეზიდენტთან, შარლ მიშელთან შეხვედრამდე გააკეთა.

"პოლიტპატიმრების, ნიკა მელიას და გიორგი რურუას გათავისუფლება — ეს იქნებოდა პირველი ნაბიჯი იმისთვის, რომ მოლაპარაკებების პროცესი განახლდეს და ჩვენ მივიდეთ იმ საბოლოო მიზნამდე, რომელიც გვქვს დასახული ქვეყანაში. რაც არის დემოკრატიული დემოკრატიული პროცესის აღდგენა და ვადამდელი, ახალი, სამართლიანი და თავისუფალი არჩევნები. ამასთან დაკავშირებით გვექნება დღეს საუბარი და იმედი გვაქვს, რომ ეს ვიზიტი აღმოჩნდება შედეგიანი ამ მიმართულებით წინ ნაბიჯების გადადგმისკენ", — განაცხადა სამადაშვილმა.

სამადაშვილის თქმით, ოპოზიციონერი ლიდერების შარლ მიშელთან შეხვედრის მთავარი მიზანია ევროკავშირის ჩართულობის გაზრდა ქვეყანაშია არსებული კრიზისის მოგვარების პროცესში.

"ჩვენი შეხვედრა დღეს, ევროკავშირის საბჭოს პრეზიდენტთან, რომელიც არის, ფაქტობრივად, უმაღლესი დონის პოლიტიკური წარმომადგენელი ევროკავშირისგან, შეეხება იმ უმძიმეს ვითარებას, რომელიც დღეს ქვეყანაში არის შექმნილი და რომელიც საფრთხეს უქმნის ჩვენი ქვეყნის ევროპულ მომავალს.

პოლიტიკური კრიზისის გამწვავება და გაღრმავება საბოლოოდ ჩამოაშორებს ჩვენს ქვეყანას ევროატლანტიკური განვითარების გზას. ამიტომ, ჩვენი დღევანდელი შეხვედრის მთავარი მიზანი არის, რომ ევროკავშირმა კიდევ უფრო გააძლიეროს საკუთარი ჩართულობა ამ კრიზისის დარეგულირებაში", — განაცხადა სალომე სამადაშვილმა.

ევროპული საბჭოს პრეზიდენტი, შარლ მიშელი საქართველოში გუშინ ჩამოვიდა და დღეს, დილიდან ოფიციალურ შეხვედრებს მართავს. იგი უკვე შეხვდა საქართველოს პრეზიდენტს, სალომე ზურაბიშვილს და იმყოფებოდა საოკუპაციო ხაზთან. ამ წუთებში იგი ოპოზიციის წარმომადგენლებს ხვდება.

გაიგეთ მეტი: