"საინფორმაციო სამსახურში მუშაობენ ადამიანები, რომლებიც აბსოლუტურად არაკონკურენტუნარიანები არიან სხვა ტელევიზიის კოლეგებთან შედარებით. სწორედ იმიტომ, რომ მათ აქვთ დაბალი ხელფასი," - ამის შესახებ საზოგადოებრივი მაუწყებლის გენერალური დირექტორის მრჩეველმა, ია ანთაძემ რუსთავი 2-ს განუცხადა.

გუშინ ანთაძემ On.ge-ს განუცხადა, რომ საზოგადოებრივი მაუწყებლის საინფორმაციო გამოშვება - მოამბის ჟურნალისტებს ატესტაცია ჩაუტარდებათ.

"ჩვენ გვინდა კარგად დავინახოთ ამ ადამინების კვალიფიკაცია, ვინც "ნიუსრუმში" მუშაობს, იმ ცვლილებების ფონზე, რაც აქ უნდა განხორციელდეს," - აცხადებდა ანთაძე.

გუშინვე მოამბის თანამშრომელმა, ლაშა მესხმა ინფორმაცია გაავრცელა იმის შესახებ, რომ საინფორმაციო სამსახურის თანამშრომლების ნაწილს ერთთვიანი ხელშეკრულება გაუფორმდათს. არხის ახალი და მიმდინარე ახალი ამბების ბლოკის დირექტორმა, გიორგი გვიმრაძემ ხანმოკლე ხელშეკრულებების გაფორმების მიზეზად არხზე მიმდინარე რეორგანიზაცია დაასახელა.