შინაგან საქმეთა სამინისტრო როგორც პოლიტიკური პარტიის წარმომადგენლებს, ასევე, ნაციონალური მოძრაობის თავმჯდომარის, ნიკა მელიას მხარდამჭერებს მოუწოდებს პოლიციის წარმომადგენლებს სასამართლოს გადაწყვეტილების აღსრულებაში ხელი არ შეუშალონ. უწყებაში აცხადებენ, რომ ძალადობის მცდელობის ნებისმიერი ფაქტი პოლიციის მიერ დაუყოვნებლივ იქნება აღკვეთილი, ხოლო საზოგადოებრივი წესრიგის დამრღვევი ნებისმიერი პირი პასუხს აგებს კანონის სრული სიმკაცრით აგებს.

"საზოგადოებისთვის ცნობილი გახდა თბილისის საქალაქო სასამართლოს მოსამართლის - ნინო ჩახნაშვილის მიერ 17 თებერვალს გამოტანილი გადაწყვეტილება ნიკანორ მელიას მიმართ პატიმრობის გამოყენების შესახებ, რომლის აღსრულება დაევალა შინაგან საქმეთა სამინისტროს.

შსს-ს წარმომადგენლებმა ადგილზე შეკრებილი მოქალაქეები გააფრთხილეს ხელი არ შეუშალონ სასამართლოს გადაწყვეტილების აღსრულებაში და ამისთვის გონივრული ვადა მისცეს მათ. მოვუწოდებთ როგორც პოლიტიკური პარტიის წარმომადგენლებს, ასევე, მათ მხარდამჭერებს პროტესტი გამოხატონ მშვიდობიანი ფორმით, თავი შეიკავონ ძალადობრივი ქმედებებისგან და ხელი არ შეუშალონ პოლიციის წარმომადგენლებს სასამართლოს გადაწყვეტილების აღსრულებაში. პოლიციის მიერ დაუყოვნებლივ იქნება აღკვეთილი ძალადობის მცდელობის ნებისმიერი ფაქტი, ხოლო საზოგადოებრივი წესრიგის დამრღვევი ნებისმიერი პირი პასუხს აგებს კანონის სრული სიმკაცრით", — წერია უწყების მიერ გავრცელებულ განცხადებაში.

ნაციონალური მოძრაობის ოფისში, სადაც ნიკა მელია მხარდამჭერებთან და ოპოზიციის სხვა ლიდერებთან ერთად არის მობილიზებული, პოლიცია და სპეცრაზმი შევიდა.