პრემიერმინისტრობის კანდიდატი, ირაკლი ღარიბაშვილი აცხადებს, რომ რომელიმე პარტიის თავმჯდომარეობა ინდულგენცია ვერ იქნება, ამ შემთხვევაში ის ნაციონალური მოძრაობის ლიდერს, ნიკა მელიას გულისხმობდა.

"ინდულგენცია არ იქნება რომელიმე პარტიიის თავმჯდომარეობა. ჩვენ ვერ გავცემთ ინდულგენციებს და ისინი ვერ შეიქმნიან ალიბს და, რა თქმა უნდა, ვერ დააღწევენ თავს მართლმსაჯულებას, სხვა შემთხვევაში, მეგობრებო, ჩვენს ქვეყანაში არ იქნება კანონი, არ იქნება მშვიდობა, არ იქნება წესრიგი, არ იქნება კონსტიტუცია", — ამბობს ღარიბაშვილი

მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.