სერენა უილიამსის სახელი ჩოგბურთის მოყვარულმა ნებისმიერმა ადამიანმა კარგად იცის. 39 წლის ჩოგბურთის ლეგენდა ავსტრალიის ღია პირველობისა და დიდი სლემის 24-ე ტიტულისთვის იბრძოდა, თუმცა, გულშემატკივრებისდა სამწუხაროდ, უილიამსი ნახევარფინალში ნაოკი ოსაკასთან დამარცხდა.

დამარცხებული უილიამსი გულშემატკივრებმა ოვაციებით დააჯილდოვეს. ჩოგბურთის ლეგენდა შეჩერდა და მაყურებლების ემოციები მადლიერების გამომხატველი ჟესტით მიიღო. ამ ჟესტის შემდეგ საზოგადოება იმაზე ალაპარაკდა, აპირებდა თუ არა სერენა უილიამსი კარიერის დასრულებას.

კარიერის დასრულების შესახებ კითხვამ პრესკონფერენციაზეც გაიჟღერა. სერენამ ცრემლები ვერ შეიკავა და შეკითხვის დასმის შემდეგ პრესკონფერენცია მალევე დატოვა.

"თუ ოდესმე დამშვიდობებას გადავწყვეტ, ამის შესახებ არავის ვეტყვი", — ასე უპასუხა ჩოგბურთელმა კითხვას.

აღსანიშნავია, რომ უილიამსი დიდი სლემის ტიტულის მფლობელი 23-ჯერ გახდა, ამჟამინდელი რეკორდსმენი, მარგარეტ კორტი კი - 24-ჯერ, ამიტომ აღნიშნული მარცხი უილიამსისთვის განსაკუთრებით რთული აღმოჩნდა.

უილიამსის ჩოგბურთიდან წასვლაზე საზოგადოება უკვე რამდენიმე წელია საუბრობს. ამის მიუხედავად, ჩოგბურთელი უკანასკნელი წლების განმავლობაში ასპარეზობას წარმატებით განაგრძობს. ჩოგბურთის უამრავი მოყვარულისთვის სერენა უილიამსი უკვე დიდი ხანია, რაც საუკეთესო მოთამაშედ ითვლება.