ხოაკინ ფენიქსი ჯოკერის თამაშს მორჩა. ალბათ დროებით მაინც.

ამერიკელი მსახიობი ბოლო ოსკარის მიღების შემდეგ პირველ პროექტზე იწყებს მუშაობს. ფენიქსი მონაწილეობას მიიღებს კინოსტუდია A24-ის ფილმში Disappointment Blvd, რომლის რეჟისორიც არი ასტერია. ასტერს ისეთ ცნობილ ფილმებზე აქვს ნამუშევარი, როგორებიც Hereditary და Midsommar არის.

წესით, კინოაკადემიის ჯილდოს მიღების შემდეგ, პირველი კინოსურათი, რომელშიც ჯოკერის მსახიობს უნდა მიეღო მონაწილეობა, რიდლი სკოტის Kitbag იყო, სადაც მას ნაპოლეონის როლი ხვდა წილად. თუმცა, როგორც ჩანს, ამ ფილმის გადაღებები უფრო გვიან დაიწყება.

ოსკარის მიღებამდე ფენიქსმა მაიკ მილსის ფილმზე, C'mon C'mon, მუშაობა დაასრულა, რომელიც ასევე A24-ს ეკუთვნის. კინოსურათის გამოსვლის სავარაუდო თარიღი ჯერჯერობით უცნობია.

Disappointment Blvd ("იმედგაცრუების ბულვარი"), აღწერის მიხედვით, "ყველა დროის ერთ-ერთი ყველაზე წარმატებული საწარმოს მფლობელის ათწლეულების განმავლობაში შექმნილ სიღრმისეულ პორტრეტს" გვაჩვენებს. ფილმის შესახებ სხვა ინფორმაცია, ჯერჯერობით, არაა ცნობილი, თუმცა ერთწინადადებიანი აღწერით, შეგვიძლია, ვივარაუდოთ, იგი ასტერის წინა ორი ნამუშევრისგან ჟანრობრივად განსხვავებული იქნება. რეჟისორმა წინათ აღნიშნა, რომ მისი მომდევნო ფილმი ოთხსაათიანი "კოშმარისეული კომედია" იქნებოდა, თუმცა, გაურკვეველია, გულისხმობდა თუ არა იგი იმედგაცრუების ბულვარს.