საზოგადოებრივი მაუწყებლის საინფორმაციო პროგრამა მოამბის თანამშრომლების ნაწილს, არხზე მიმდინარე რეორგანიზაციის გამო, ერთთვიანი ხელშეკრულება გაუფორმდათ. ინფორმაცია 13 თანამშრომელთან ხანმოკლე ხელშეკრულებების გაფორმების შესახებ, მოამბის ჟურნალისტმა, ლაშა მესხმა ფეისბუკში გაავრცელა.

"ფარსია გავრცელებული ინფორმაცია, რომ თითქოსდა მაუწყებლის საინფორმაციო პროგრამა მოამბე საფრთხის ქვეშ არ არის. მე როგორც მოამბის კორესპონდენტი და საქართველოს მედიის პროფესიული კავშირის თავმჯდომარე ვაცხადებ, რომ ცვლილებები შესაძლოა, სწორედ მოამბიდან მიმდინარე თვის ბოლოს დაიწყოს," - ასე შეაფასა ლაშა მესხმა ჟურნალისტების ნაწილისთვის გაფორმებული ერთთვიანი ხელშეკრულების მიზეზი.

მისი შეფასებით, მსგავსი მოკლევადიანი ხელშეკრულებები თანამშრომლებს სტრესულ ვითარებაში აგდებს და მათ მიმართ უპატივცემულობაა. „მოამბე საფრთხეშია და დიახ მაუწყებელში კვლავ იდევნება განსხვავებული აზრი!" - დასძენს ის.

საზოგადოებრივი მაუწყებლის ახალი და მიმდინარე ამბების ბლოკის დირექტორის, გიორგი გვიმრაძის თქმით, მოამბეში დიდი ხანია დაგეგმილია ცვლილებები და პროცესი მიმდინარეობს, რაც კადრების გადახალისებას და "თანამშრომლების სიმწირის ამოვსებასაც" გულისხმობს.

"რეორგანიზაციის პროცესიდან გამომდინარე იყო ეს შეთავაზება გაკეთებული. თუმცა, ჩვენ მათ შევპირდით, რომ ყველაფერს გავაკეთებთ იმისთვის, რომ მსგავსი მოკლევადიანი ხელშეკრულებები აღარ დაიდოს და საბოლოო ჯამში, შევჯერდებით, როგორ ვაგრძელებთ მათთან გრძელვადიან თანამშრომლობას," - განმარტა გვიმრაძემ.

მაუწყებლის გენერალური დირექტორის მრჩეველი, ია ანთაძე მიიჩნევს, რომ ერთთვიანი ხელშეკრულება არ აისახება თანამშრომლების მოტივაციაზე.

"შეიძლება იყოს სტრესული გარემო, შეიძლება - არა. ალბათ, არის. მეორე მხრივ, როცა ადამიანი მუშაობს და სანამ მას აქვს შანსი, რომ საკუთარი კვალიფიკაცია დაადასტუროს, მან ყველაფერი უნდა გააკეთოს იმისთვის, რომ შექმნას, რაც შეიძლება, მაღალი ხარისხის პროდუქტი," - ამბობს ია ანთაძე.

საზოგადოებრივი მაუწყებლის გენერალურმა დირექტორმა, ვასილ მაღლაფერიძემ გუშინ, 6 თებერვალს მედიას და სამეურვეო საბჭოს საკუთარი ხედვა წარუდგინა. მაღლაფერიძე, სამეურვეო საბჭოს თანხმობის შემთხვევაში, ფულის დაზოგვის მიზნით, გეგმავს 2018 წლამდე მაუწყებლის 101 გადაცემის შეჩერებას. დირექტორს ხედვაში საინფორმაციო გამოშვენა მოამბის შეჩერებაზე სუბარი არ იყო.