ლიეტუვის ელჩის, ანდრიუს კალინდრას განცხადებით, აშფოთებთ ისეთი მომავალი, რომელიც, შესაძლოა, არაპროპორციული ზომების მიღებამ გამოიწვიოს. ნაციონალური მოძრაობის ოფისში შეხვედრაზე შესვლამდე ელჩმა მედიასთან კომენტარი გააკეთა და აღნიშნა, რომ ლიეტუვა საქართველოს ძლიერი მხარდამჭერია.

"ჩვენ ვმუშაობთ ყველა პოლიტიკურ პარტიასთან წარმატების მისაღწევად ევროატლანტიკური ინტეგრციისაკენ. ასევე, გამოვხატავ სოლიდარობას მიმდინარე მოვლენების მიმართ. ცხადია, გვაშფოთებს ისეთი მომავალი, რომელიც, შესაძლოა, არაპროპორციული ზომების მიღებამ გამოიწვიოს", — განაცხადა ელჩმა [რუსთავის 2-ის თარგმანი].

ანდრიუს კალინდრას ენმ-ს ოფისთან პარტიის ერთ-ერთი წევრი, სალომე სამადაშვილი დახვდა. სამადაშვილის თქმით, ნიკა მელიას საქმეზე განვითარებულ მოვლენებთან დაკავშირებით კონსულტაციები ევროკავშირის ყველა წევრ სახელმწიფოსთან იგეგმება.

"დარწმუნებული ვარ, უახლოეს საათებში თუ არა, დღეს-ხვალ იქნება, ასევე, ძალიან მკაცრი გზავნილები ბრიუსელიდან, ევროკავშირის ყველა წევრი ქვეყნის სახელით. ჩვენს პარტნიორებს ძალიან კარგად ესმით, რომ არსებულ ვითარებაში, ამ პოლიტიკურ კრიზისში, ერთადერთი გამოსავალი არის ხელისუფლების მხრიდან იმ ნაბიჯების გადადგმა, რომელიც შეთანხმდა საერთაშორისო პარტნიორების თანამონაწილეობით ჯერ კიდევ 8 მარტს და ეს ნიშნავდა სწორედ პოლიტიკური დევნის შეწყვეტას ქვეყანაში. ამიტომ, ჩვენი მოთხოვნები უცვლელია — უნდა შეწყდეს პოლიტიკური დევნა ნიკა მელიას წინააღმდეგ. ჩვენ, ასევე, ვისაუბრეთ გიორგი რურუას საქმეზე და გიორგი რურუას გათავისუფლების საკითხი არის, ასევე, პოლიტიკურ დღის წესრიგში და გარდა ამისა, ვისაუბრეთ იმაზე, როგორ გვესახება მოლაპარაკებების გაგრძელება იმისთვის, რომ ქვეყანაში შედგეს სამართლიანი და თავისუფალი ვადამდელი საპარლამენტო არჩევნები", — განაცხადა სამადაშვილმა.

ნიკა მელიასთვის პატიმრობის შეფარდებიდან რამდენიმე საათში, დღეს, საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

ამის შემდეგ განცხადება გაკეთდა ქართულ ოცნებაშიც. პარტიის თავმჯდომარის, ირაკლი კობახიძის განცხადებით, ქართულ ოცნებაში ხვალ პოლიტსაბჭოს სხდომა გაიმართება, სადაც პრემიერმინისტრობის კანდიდატზე იმსჯელებენ.

გუშინ, 17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.

მთელი ღამის განმავლობაში ნაციონალური მოძრაობის ოფისში ოპოზიციური პარტიების ლიდერები იმყოფებოდნენ. ისინი აცხადებენ, რომ ხელისუფლებას მელიას დაკავების საშუალებას არ მისცემენ. დღეს დილიდან პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.