პარტია თავისუფალი საქართველოს ლიდერმა, კახა კუკავამ დღეს ოპოზიციის საერთო შეხვედრის შემდეგ თქვა, რომ იქ გირჩის ლიდერები, ვახო მეგრელიშვილი და იაგო ხვიჩია "დაბოლილები" იყვნენ. მისი თქმით, ხვიჩია და მეგრელიშვილი ლეიბორისტული პარტიის ოფისში დაუპატიჟებლად მივიდნენ.

"ორივე დაბოლილი იყო დღეს მოსული და უნდოდათ, როგორც ყოველთვის, ყურადღების მიქცევა. ხან მელიას დააბრალეს, რომ პისტოლეტით დასდევდა და დღეს მოიგონეს მეორე სისულელე. სინამდვილეში, სტენოგრამა იყო ასეთი: ჯერ ერთი, დაუპატიჟებლები მოვიდნენ, ზრდილობიანად სთხოვა ბატონმა ნათელაშვილმა რომ დაეტოვებინათ დღევანდელი შეკრება. რის შემდეგაც დაიწყეს პროვოკაცია, რომ არა, ჯერ უნდა მოგვისმინოთო. ამაზე ვუპასუხე, რომ გამოდიხართ ტელევიზიაში და გვაბრალებთ მიშას თამაშს თამაშობთო, მაშინ აქ რატომ მოდიხართ-მეთქი? ამაზე ჩავარდა ექსტაზში ხვიჩია, რომ აი, აღიარა მიშას თამაშს თამაშობენო და ამის შემდეგ მოუწიათ სხდომის დატოვება", — განაცხადა მან.

კუკავას იაგო ხვიჩია რუსთავი 2-ის ეთერში გამოეხმაურა და თქვა, რომ ამის "წამოძახება არასწორი" იყო, რადგან იქ ბევრთან, მათ შორის, კუკავასთან ერთადაც მოუწევია.

"ერთადაც მოგვიწევია, მაგ ხალხთან ერთად მარიხუანა, ბევრთან. კახა კუკავასთანაც, მე მგონი, მაგასთანაც მომიწევია. რა პრობლემაა, ახალგაზრდა ხალხი ვართ. ამის წამოძახება რაღაცნაირად არასწორია, მით უმეტეს, როცა ერთად გვაქვს მოწეული, ბოლოს და ბოლოს", — თქვა ხვიჩიამ.

დღეს ოპოზიციის წარმომადგენლები ერთმანეთს შეხვდნენ. შეხვედრის შემდეგ მათ განაცხადეს, რომ 25 თებერვალსა და 31 მარტს თბილისსა და რეგიონებში აქცია-მსვლელობას გამართავენ. შეხვედრაზე იმყოფებოდნენ გირჩის წევრებიც, თუმცა მეგრელიშვილმა და ხვიჩიამ სხდომა დასრულებამდე დატოვეს. ამავე შეხვედრიდან გამოსულმა იაგო ხვიჩიამ განაცხადა, რომ იქ მყოფებმა ფაქტობრივად ერთხმად დაადასტურეს, რომ მიშას თამაშს თამაშობენ.