დემოკრატიული მოძრაობა — ერთიანი საქართველოს ლიდერმა, ნინო ბურჯანაძემ განაცხადა, რომ ნაციონალური მოძრაობის თავმჯდომარე, ნიკა მელია, არის გულწრფელი ადამიანი და მას ვერავინ გადაადგმევინებს ისეთ ნაბიჯს, რომლისაც არ სჯერა.

"ნიკა მელია არის ერთ-ერთი ყველაზე გულწრფელი ადამიანი ქართულ პოლიტიკაში. მას ვერავინ ვერ გადაადგმევინებს იმ ნაბიჯს, რომლისაც მას არ სჯერა და რაც მთავარია, ახლა რისიც მას სჯერა, ეს არის სწორი", — განაცხადა ნინო ბურჯანაძემ.

ბურჯანაძე ფიქრობს, რომ ნიკა მელიას არ დააკავებენ, თუმცა დასძენს, რომ თუ ასე მოხდება ქართულ ოცნება ეს ძვირად დაუჯდება.

"მე მაინც იმედს ვიტოვებ, რომ ხელისუფლება არ გადადგამს ისეთ უგუნურ ნაბიჯს, რომ დააკავოს პირველი ოპოზიური პარტიის [ლიდერი]. თუ გადადგამს, ძალიან ძვირად დაუჯდება, პირდაპირ შემიძლია გითხრათ. როგორც მორალურად, ასევე პოლიტიკურად.

ნიკა [მელია], ჯერ ერთი, ჩემი უმცროსი მეგობარია, მაგრამ, რაც გაცილებით უფრო მნიშვნელოვანია ამ შემთხვევაში, ალბათ, ის უსამართლობას ებრძვის. ებრძვის პრინციპულად, ებრძვის ვაჟკაცურად და შესაბამისად, რა თქმა უნდა, ყველა იმ ქმედებებში, რაც იქნება საჭირო იმისათვის, რომ ხელისუფლებამ უსამართლოდ არ დაჩაგროს ქვეყნის მოქალაქე, ამ შემთხვევაში, ოპოზიციური პარტიის ლიდერი, მე და ჩემი თანაგუნდელები, მე და ჩემი თანაპარტიელები, რა თქმა უნდა, ვიქნებით ნიკა მელიას გვერდით", — განაცხადა ბურჯანაძე, დღეს, 15 თებერვალს, ოპოზიციურ პარტიებს შორის გამართული შეხვედრის შემდეგ.

გუშინ, 14 თებერვალს, პარტია გირჩის ერთ-ერთმა ლიდერმა, იაგო ხვიჩიამ განაცხადა, რომ ნიკა მელიას ციხეში მოხვედრა ექსპრეზიდენტ მიხეილ სააკაშვილის "თამაშია".

"როგორც შემიძლია ვიბრძვი და შენ მეუბნები, რომ ნუ იბრძვიო", — ასე უპასუხა მელიამ ხვიჩიას.

13 თებერვალს, ქართული ოცნების აღმასრულებელმა მდივანმა, მამუკა მდინარაძემ განაცხადა, რომ მმართველი პარტია ნიკა მელიასთვის დეპუტატის იმუნიტეტის მოხსნას მხარს დაუჭერს, რაც პროკურატურას უფლებას აძლევს, ნაციონალური მოძრაობის თავმჯდომარე დააკავოს.

ერთი დღით ადრეე, 12 თებერვალს, გენერალურმა პროკურატურამ მელიას დაკაებისთვის პარლამენტს მელიას დამიმართა. იმის გამო, რომ მელია ოფიციალურად პარლამენტის დეპუტატია, მას იმუნიტეტი იცავს.

გენერალურ პროკურატურას მელიასთვის იმუნიტეტის მოხსნა სჭირდება იმისთვის, რომ სასამართლოს პატიმრობის შუამდგომლობით მიმართოს. იმუნიტეტის მოხსნი საკითხი კი პარლამენტის პლენარულ სხდომაზე უნდა გადაწყდეს.

პროკურატურამ ნიკა მელიას ერთკვირიანი ვადა მისცა, რათა გირაოს თანხა გადაეხადა, რომელიც მას ელექტრონული სამაჯურის მოხსნის შემდეგ დაეკისრა. ეს ვადა სწორედ 12 თებერვალს ამოიწურა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ამავე საქმეზე ნიკა მელიასთვის იმუნიტეტის შეწყვეტა პროკურატურამ 2019 წლის ივნისშიც მიმართა. მაშინ პარლამენტმა მხარი დაუჭირა მელიასთვის იმუნიტეტის მოხსნას და პროკურატურას მისი დაკავების უფლება თუმცა სასამართლომ მას პატიმრობის ნაცვლად გირაო შეუფარდა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

• საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
• საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
• დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს არჩევნებთან დაკავშირებულ საპროტესტო აქციაზე მელიამ ელექტრონული მონიტორინგისთვის განკუთვნილი სამაჯური მოიხსნა და განაცხადა რომ მას აღარ გაიკეთებდა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 ათას ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათასი ლარი შეეფარდა.