ვანის მუნიციპალიტეტმა 2018-2019 წლებში გადაუდებელი აუცილებლობის მოტივით 15 გამარტივებული შესყიდვა განახორციელა და ამის მიუხედავად, ყველა ეს პროექტი დაგვიანებით დაასრულა. დაგვიანებით დასრულებულ პროექტებს შორისაა სტიქიის სალიკვიდაციო სამუშაოებიც. ჯამში, ამ პროექტების ღირებულება ორ მილიონ ლარზე მეტი იყო.

სახელმწიფო აუდიტის სამსახურის ანგარიშის მიხედვით, შესყიდვის დოკუმენტაციის შესწავლით გამოვლინდა, რომ მუნიციპალიტეტმა ვერც ერთი ეს პროექტი ვერ მიიღო დაგეგმილ ვადაში და პროექტები ჩაიბარა მნიშვნელოვანი ვადაგადაცილებით. მაგალითად:

  • ზეინდრის ადმინისტრაციულ ერთეულში შუაგორა-ზედაგორას დამაკავშირებელი საავტომობილო გზის სარეაბილიტაციო სამუშაოებზე ხელშეკრულება გაფორმდა 2018 წლის 12 დეკემბერს, თანხით 1 468 600 ლარი. მიმწოდებელმა სამუშაო დაასრულა და მუნიციპალიტეტმა პროექტი ჩაიბარა 203 დღის დაგვიანებით, 2019 წლის სექტემბერში;
  • შუაგორას საჯარო სკოლის გათბობის მოწყობასთან დაკავშირებით, ხელშეკრულება გაფორმდა 2019 წლის 5 აგვისტოს, თანხით 92 600 ლარი. მუნიციპალიტეტმა პროექტი ჩაიბარა 2020 წლის მარტში, 201 დღის დაგვიანებით.

აუდიტის სამსახურის ინფორმაციით, ანალოგიურად, დანარჩენი 13 პროექტი, მუნიციპალიტეტმა ჩაიბარა 32-დან 70 დღემდე დაგვიანებით.

"მუნიციპალიტეტმა გამარტივებული შესყიდვის საშუალება გამოიყენა იმისათვის, რომ ინფრასტრუქტურული პროექტები მიეღო შემჭიდროვებულ ვადებში. მიუხედავად ამისა, მერიამ შესყიდვის პროცესი წარმართა და მათ შორის, ხელშეკრულების პირობები განსაზღვრა იმგვარად, რომ ვერ უზრუნველყო მიწოდების ვადების დარღვევის პრევენცია. შედეგად, კონტროლის მექანიზმების სისუსტის გამო, პროექტების დაგეგმილ ვადაში მიღება ვერ მოხერხდა. მათ შორის, სტიქიის შედეგები აღმოფხვრილია რამდენიმე თვის დაგვიანებით", — აღნიშნულია აუდიტის სამსახურის ანგარიშში.