"თუ ბექა ოდიშარია იმის გამკეთებელია, რომ მეორეჯერ მიაჭიროს ღილაკს და კვლავ დაიჭიროს ნიკა მელია, კი ბატონო, მიაჭირეთ კაცო, რაც გინდა ქენით", — ასე გამოეხმაურა ნაციონალური მოძრაობის თავმჯდომარე, ნიკა მელია მისთვის დეპუტატის მანდატის ხელახლა შეჩერების სავარაუდო საკითხს.

TV პირველის ეთერში მელიამ გაიხსენა, როგორ შეუწყვიტეს მანდატი პირველად ქართული ოცნების დეპუტატებმა. მისი თქმით, კენჭისყრის პარალელურად დეპუტატები თვალს არიდებდნენ, რადგან არც მათ მოსწონდათ ეს გადაწყვეტილება.

რაც შეეხება ბექა ოდიშარიას, 2019 წელს, მანდატის შეწყვეტის შემდეგ ნიკა მელია მას პარლამენტის ეზოში დაედევნა და ჰკითხა, რატომ დაუჭირა მხარი მის დაკავებას.

"ბექა, მე არ გამექცე, ბიჭო. ეს არის ბექა ოდიშარია, ადამიანი, რომელსაც ბავშვობიდან ვიცნობ, ერთად გავიზარდეთ. ამ ადამიანმა ღილაკს ხელი დააჭირა", — განაცხადა მელიამ მაშინ.

პარლამენტის შესასვლელთან მყოფი ოდიშარია წასვლას ცდილობდა და პასუხობდა "გეყოფა, ბიჭო", რაზეც მელიამ მას თქვა: "მიჭერდი ბოლო-ბოლო და ცოტა ხანი რომ შეგაკავო არ შეიძლება".

2019 წლის 26 ივნისს საქართველოს პარლამენტის პლენარულ სხდომაზე მხარი დაუჭირეს პროკურატურის მიმართვას ნიკა მელიასადმი პატიმრობის ნებართვის გამოყენებაზე. პროკურატურის მიმართვას მხარი დაუჭირა 91-მა დეპუტატმა წინააღმდეგი არავინ ყოფილა. ეს ნიშნავდა, რომ ნიკა მელიას დეპუტატის მანდატი აღარ იცავდა და პროკურატურას აღმკვეთ ღონისძიებად პატიმრობის შუამდგომლობის დაყენება შეეძლო.

5 თებერვალს, გენერალურ პროკურატურაში განაცხადეს, რომ ნიკა მელიას აღმკვეთი ღონისიძიების, გირაოს პირობების შესრულებისთვის ერთკვირიან ვადას აძლევენ. თანხის გადაუხდელობის შემთხვევაში პროკურატურა სასამართლოს აღკვეთის ღონისძიების პატიმრობით შეცვლის თაობაზე მიმართავს.

უწყების ცნობით, "მიუხედავად იმისა, რომ ბრალდებულ ნიკა მელიას საკუთრებაში გააჩნია უძრავი ქონება, რომელიც გირაოს უზრუნველსაყოფად საკმარისია, აღკვეთის ღონისძიების პირობა არ შეასრულა".

მელია აცხადებს, რომ პროკურატურის მიერ მოთხოვნილ გირაოს არ გადაიხდის.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს, საზოგადოებრივი თავშეყრის ადგილას საჯარო განცხადების გაკეთებისას, მელიამ ელექტრონული მონიტორინგისთვის განკუთვნილი სამაჯური მოიხსნა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 000 ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობა 40 000 ლარით გაიზარდა.