დაავადებათა კონტროლის ცენტრის დირექტორის, ამირან გამყრელიძის განცხადებით, თვითონ მწარმოებლები ჯერჯერობით კერძო სექტორს კონტრაქტს არ უდებენ კორონავირუსის ვაქცინის შემოტანასთან დაკავშირებით.

"ჩვენ ვესაუბრებით კერძო სექტორს, თუ აქვთ საშუალება კი, მაგრამ მე რამდენადაც ინფორმაცია მაქვს, თვითონ მწარმოებლები ჯერჯერობით კერძო სექტორს არ ესაუბრებიან და არ უდებენ კონტრაქტებს ვაქცინის შემოტანასთან დაკავშირებით", — განაცხადა გამყრელიძემ.

მისივე თქმით, როცა მწარმოებლების მიერ სახელმწიფოების მიმართ ვალდებულებები შესრულდება, შემდეგ კერძო ინიციატივებიც იქნება.

ლელოს ლიდერმა, მამუკა ხაზარაძემ 6 თებერვალს განაცხადა, რომ სახელმწიფო ვაქცინაციის პარალელურად, ნებადართული უნდა იყოს ვაქცინის კომერციულად შემოტანა წინასწარ დათქმული პირობების შესაბამისად.