პარლამენტის წევრი და პიანისტი ელისო ბოლქვაძე ამბობს, რომ კომიტეტის თავმჯდომარე, თეა წულუკიანი კულტურის სამინისტროს "ბრწყინვალე" მინისტრი იქნება. ამის შესახებ მან TV პირველს განუცხადა.

"თეა წულუკიანი იქნება ბრწყინვალე მინისტრი. იმიტომ რომ ძალიან პრინციპულია, ძალიან დიდ პატივს ვცემ ქალბატონ თეას. [კვალიფიციური მინისტრი იქნება], რა თქმა უნდა, რადგან არის უჭკვიანესი ადამიანი", — აღნიშნა ბოლქვაძემ.

ქართული ოცნების ხელისუფლებაში მოსვლის შემდეგ თეა წულუკიან რვა წლის განმავლობაში იუსტიციის მინისტრის პოსტი ეკავა. თანამდებობა მან 2020 წლის შემოდგომაზე დატოვა, როცა საარჩევნო კამპანიაში ჩაერთო. ამის შემდეგ ის პარლამენტში განათლებისა და კულტურის კომიტეტის თავმჯდომარედ დაინიშნა.

როგორც დაგეგმილია, განათლების, მეცნიერებისა, კულტურისა და სპორტის სამინისტრო გაიყოფა და კულტურის სამინისტრო შეიქმნება, რომელშიც სპორტისა და ახალგაზრდობის საკითხებიც გაერთიანდება.

ბოლო რამდენიმე დღეა მედიაში ვრცელდება ინფორმაცია, რომ სწორედ თეა წულუკიანი უხელმძღვანელებს ახალ სამინისტროს. თუმცა არც თვითონ წულუკიანი და არც მთავრობა აღნიშნულ ინფორმაციას ჯერჯერობით არ ადასტურებენ.