მოსკოვში სამდღიანი ვიზიტის დასასრულს ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში, ჯოზეფ ბორელმა რუსი ოპოზიციონერის, ბორის ნემცოვის მკვლელობის ადგილზე ყვავილები მიიტანა. ნემცოვი 2015 წელს კრემლთან მდებარე ხიდზე ცეცხლსასროლი იარაღიდან მოკლეს.

"ვიზიტის ბოლოს მე პატივი მივაგე მათ, ვინც ადამიანის ფუნდამენტური უფლებების დაცვას თავისი სიცოცხლე და თავისუფლება შესწირა. მე ბორის ნემცოვის მკვლელობის ადგილს ვესტუმრე", — წერს ბორელი ტვიტერში.

ჯოზეფ ბორელი მოსკოვში 4-6 თებერვალს იმყოფებოდა. იგი რუსეთის საგარეო საქმეთა მინისტრ სერგეი ლავროვს უკრაინაში მიმდინარე მოვლენებზე, ბელარუსსა და მეზობელ ქვეყნებთან კონფლიქტზე ესაუბრა. გარდა ამისა, უმაღლესი წარმომადგენელი ადგილობრივ ორგანიზაციებს შეხვდა, რომელთაც მუშაობაში ხელი ეშლებათ.

ამასთან, მან კიდევ ერთხელ გაუსვა ხაზი, რომ ევროკავშირი გმობს ოპოზიციონერი ალექსეი ნავალნის დაკავებას. ბორელმა შეშფოთება გამოთქვა 5 თებერვალს სამი ევროპელი დიპლომატის გაძევების გამოც, რომელიც ნავალნის მხარდასაჭერ აქციებში მონაწილეობდა. მან მოუწოდა, რუსეთის ხელისუფლებას გადახედოს თავის გადაწყვეტილებას.