ჯავახეთის მცხოვრებლები დღეს ახალქალაქის ცენტრში ისევ შეიკრიბნენ და მთავრობას კორონავირუსის გამო ჩაკეტილი საზღვრების გახსნისკენ კიდევ ერთხელ მოუწოდეს. ისინი მერიის შენობაში შევიდნენ და ქალაქის მერს თავიანთი პრობლემები გააცნეს. აქციის 100-მდე მონაწილეს ქალაქის მერი იურიკ უნანიანი მერიის დერეფანში შეხვდა.

აქციის მონაწილეები ამბობენ, რომ მოსაზღვრე სომხეთთან და რუსეთთან საზღვრის ჩაკეტვის გამო სეზონურ სამუშაოებზე წასვლის შესაძლებლობა არ აქვთ და რომ ოჯახებს შემოსავლის გარეშე უწევთ არსებობა. ხალხი, ასევე, ამბობს, რომ აღებული სესხის გამო, ისინი სახლების დაკარგვის საფრთხის წინაშეც დგანან. ადგილობრივი მედია JNEWS-ის ცნობით, მათ მთავრობას მოთხოვნების დასაკმაყოფილებლად ერთი კვირა მისცეს.

საზღვრის გახსნის მოთხოვნით ახალქალაქში აქცია 31 იანვარსაც გაიმართა.