იუსტიციის უმაღლესი საბჭოს მდივანი, ლევან მურუსიძე მოსამართლეებზე განხორციელებული სავარაუდო ზეწოლის ფაქტთან დაკავშირებით ჟურნალისტებთან კომენტარს აკეთებს. მისი განცხადებით, მოსამართლეებს ყოფილი ხელისუფლების წარმომადგენლების სახელით მისდიოდათ მუქარის შემცველი შეტყობინებები:

"მოსამართლეებს ჩემთვის არ მოუმართავთ. როგორც ვიცი, ყოფილი ხელისუფლების მაღალჩინოსნების სახელით მიუვიდათ ამ მოსამართლეებს წერილები და სატელეფნო შეტყობინებები, რომელიც ამ მოსამართლეებმა მიიტანეს უზენაესი სასამართლოს ხელმძღვანელთან და მან გადააგზავნა პროკურატურაში. თუ დადგინდება რომ ის წერილი ავთენტურია და რეალურად ამ მოსამართლეებს ახდენს ზეწოლას, ეს ძალიან ცუდია".

2 თებერვალს, ცნობილი გახდა, რომ 2017 წლის 14 იანვარს, უზენაესი სასამართლოს მოსამართლეების, ბესარიონ ალავიძისა და პაატა ქათამაძის განცხადებისა და სასამართლოს მომართვის საფუძველზე დაიწყო გამოძიება. პროკურატურის ცნობით, მოსამართლეებმა ყოფილი სახელისუფლებო პირის სახელით მიიღეს SMS-ები.