საქართველომ ევროსაბჭოს საპარლამენტო ასამბლეის სხდომაზე საქართველომ ასამბლეაში რუსეთის დელეგაციის უფლებამოსილების ცნობის საკითხს მხარი არ დაუჭირა.

საქართველოს საპარლამენტო დელეგაციის ხელმძღვანელმა, კახა კუჭავამ განაცხადა, რომ რუსეთი კვლავ აგრძელებს იმ ფუნდამენტური წესებისა და ნორმების დარღვევას, რაც ევროკავშირის წესდებაშია.

"რუსეთმა დაარღვია ადამიანის ფუნდამენტური უფლებები, მათ შორის: წამების აკრძალვა, სიცოცხლის უფლება, გადაადგილების თავისუფლება და საკუთრების უფლება. ნება მიბოძეთ, გკითხოთ — შეიცვალა რამე 2008 წლის შემდეგ?! ასრულებს რუსეთი ცეცხლის შეწყვეტის შესახებ 2008 წლის 12 აგვისტოს შეთანხმებას?! იკვეთება მისი დამოკიდებულების ან ქცევის ცვლილება საქართველოს ოკუპირებული ტერიტორიების მიმართ?! შეასრულა მან ევროსაბჭოს რეკომენდაციები?! ყველა ამ კითხვაზე პასუხი ცალსახაა — არა", — განაცხადა კუჭავამ.

სწორედ ამიტომ, მან თქვა, რომ სანამ რუსეთი ევროსაბჭოს ძირითადი პრინციპების უგულებელყოფას განაგრძობს, საქართველო მხარს არ დაუჭერს რუსეთის დელეგაციის უფლებამოსილების ცნობას ასამბლეაში.

"ამ ყველაფერს თან ერთვის რუსეთის მიერ ცეცხლის შეწყვეტის შესახებ ევროკავშირის შუამავლობით მიღწეული შეთანხმების არ შესრულება და ახალი ნაბიჯების გადადგმა საქართველოს ოკუპირებული რეგიონების ფაქტობრივი ანექსიისკენ. შესაბამისად, სანამ ევროსაბჭოს ძირითადი პრინციპების: საერთაშორისო სამართლისა და ადამიანის უფლებათა ფუნდამენტური ნორმების ამგვარი უგულებელყოფის მოწმენი ვართ და ეს ნორმები წარმოადგენს ევროსაბჭოს მთავარ პრინციპს, ჩვენ მხარს არ დავუჭერთ რუსეთის დელეგაციის უფლებამოსილების ცნობის საკითხს ასამბლეაში", — განაცხადა კუჭავამ.