სულ ცოტა ხნის წინ ახალი ჯაშუშური თრილერის — The Courier-ის ტრეილერი გავრცელდა, სადაც ბენედიქტ კამბერბეჩისა და რეიჩელ ბროსნაჰანის გვერდით ქართველ მსახიობს, მერაბ ნინიძესაც იხილავთ.

ფილმის რეჟისორი დომინიკ კუკია, რომლის ფილმოგრაფიაც სერიალ The Hollow Crown-ის სამ ეპიზოდსა და დრამის ჟანრის ფილმ On Chesil Beach-აც მოიცავს.

"ცივი ომის პერიოდში აგენტი გრევილ ვაინი და მისი რუსი წყარო კუბას სარაკეტო კრიზისის გადაჭრას ცდილობენ", — ვკითხულობთ ფილმის აღწერაში.

მოქმედება ცივი ომის პერიოდში ვითარდება და ბრიტანული საიდუმლო სადაზვერვო სამსახურის მიერ დაქირავებულ ბიზნესმენზე გვიყვება, რომლის როლსაც კამბერბეჩი ასრულებს. მერაბ ნინიძე რუსი გენერლის ოლეგ პენკოვსკის როლში მოგვევლინება, რომელიც ბრიტანეთის სადაზვერვო სამსახურისთვის მუშაობდა, კოდური სახელით Ironbark. რეიჩელ ბროსნაჰანი კი ამერიკის სადაზვერვო სამსახურის აგენტის როლს შეასრულებს. როგორც ფილმის ტრეილერიდან ვიგებთ, სიუჟეტი ნამდვილ ამბავზეა დაფუძნებული.

ფილმის თავდაპირველი სახელწოდება Ironbark იყო და მისი ჩვენება სანდენსის კინოფესტივალზე, 2020 წლის იანვარში შედგა. თრილერის გავრცელება 2020 წლის აგვისტოში იყო დაგეგმილი, თუმცა პანდემიის გამო ორჯერ გადაიდო და ფილმს 19 მარტს ვიხილავთ.