ევროკავშირი ვაქცინების ექსპორტის გამკაცრებას გეგმავს, რისი მიზეზიც AstraZeneca-ს მიერ ბლოკში შემავალი ქვეყნების ვაქცინებით მომარაგების გეგმასთან დაკავშირებული პრობლემებია. ამის შესახებ ინფორმაციას BBC ავრცელებს.

გამოცემის ცნობით, გასულ კვირას AstraZeneca-მ ევროკავშირს განუცხადა, რომ წარმოების პრობლემების გამო ქვეყნებისთვის ვაქცინების განსაზღვრული რაოდენობის მიწოდებას ვერ ახერხებდა. ევროკავშირის ჯანდაცვის კომისარი, სტელა კირიაკიდესი ტვიტერზე ამ პრობლემებს გამოეხმაურა და დაწერა, რომ AstraZeneca-სთან დისკუსიამ მიწოდების გეგმის "სიცხადის არარსებობის გამო" მათში უკმაყოფილება გამოიწვია. მისი თქმით, ვაქცინის შემქმნელებს აქვთ საზოგადოებრივი და სახელშეკრულებო პასუხისმგებლობა, რომელიც უნდა დაიცვან.

მისი განცხადებით, ევროკავშირმა წევრ სახელმწიფოებთან ერთად AstraZeneca-გან ვაქცინის მიწოდების დეტალური გეგმა მოითხოვა და საკითხის განსახილველად ოთხშაბათს კიდევ ერთი შეხვედრა ჩაინიშნა.

BBC-ის ინფორმაციით, ევროკავშირის განცხადებებს ბრიტანეთის COVID-19-ის განაწილების მინისტრი, ნადიმ ზაჰავი გამოეხმაურა და განაცხადა, რომ მართალია მარაგი "მჭიდროა", ის დარწმუნებულია, რომ AstraZeneca და Pfizer-BioNTech-ა ვაქცინების საჭირო რაოდენობის მიწოდებას შეძლებენ და ბრიტანეთი თებერვლის შუა რიცხვებში განსაზღვრულ მიზანს ვაქცინაციის მხრივ მიაღწევს.