ლელო აცხადებს, რომ მათთვის კატეგორიულად მიუღებელია ბათუმში მომხდარი ინციდენტი, როცა აჭარის უმაღლესი საბჭოს წევრს, ირაკლი ჩავლეიშვილს თავზე ნაგავი დააყარეს. პარტიის განცხადებით, ეს არ არის გამოხატვის თავისუფლება და პირიქით, არის მასზე თავდასხმა.

"ბათუმში მომხდარმა ფაქტმა კიდევ ერთხელ გვაჩვენა ახალი პოლიტიკური სტანდარტების დამკვიდრების აუცილებლობა; სადაც, პოლიტიკის იარაღი სიტყვა, არგუმენტები და გუნდური ძალისხმევაა", — წერია პარტიის განცხადებაში.

ისინი იხსენებენ სამოქალაქო აქტივისტ გიგა მაქარაშვილზე თავდასხმას, როცა მას გორის მერიის თანამშრომელმა თავზე ნაგავი დააყარა. პარტიაში აცხადებენ, რომ ეს ფაქტი შესაბამისი რეაგირების გარეშე დარჩა და ამიჯნებისნ პოლიტიკის მსგავს, მიუღებელ პრაქტიკას.

დღეს, 23 იანვარს აჭარის უმაღლესი საბჭოს წევრს მოქალაქეებმა ქუჩაში ნაგავი დააყარეს. ამის ამსახველი ვიდეო ორგანიზაცია ალტერნატივამ გაავრცელა.

როგორც ალტერნატივის მიერ გავრცელებულ ვიდეოკადრებში ჩანს, მოქალაქეები ჩავლეიშვილს ქუჩაში შეხვდნენ. ისინი "მონა, მოღალატეს" სკანდირებდნენ და ეუბნებოდნენ, რომ ის საბჭოში გაყალბებული მანდატით შევიდა.

"რომ შემოვტრიალდი და დამხვდა შვილიშვილის ტოლა ბავშვი, მივხვდი, რომ ახლა იმაზე ხელის გასვრა არ შეიძლებოდა და მე საჯარო პირი ვარ და მაქვს თმენის ვალდებულება. ეს ზუსტად მოქალაქეებისა და ნაციონალური მოძრაობის სახეს აჩვენებს, როგორ უნდათ მათ, ხელისუფლებაში მოვიდნენ და მართონ", — განაცხადა ჩავლეიშვილმა On.ge-სთან.

დეკემბერში ირაკლი ჩავლეიშვილმა რესპუბლიკური პარტია დატოვა და საბჭოში შესვლა გადაწყვიტა. პარტიის დატოვების მიზეზად მან ბოიკოტთან დაკავშირებით განსხვავებულ პოზიციებს ასახელებს.

ამავე თემაზე: