ქართული ოცნების დეპუტატის, ბექა დავითულიანის განცხადებით, საქართველოს კონტროლირებადი ტერიტორიიდან გატაცებულ მოქალაქეებზე სახელმწიფოს ამ ეტაპზე რეაგირება მხოლოდ საერთაშორისო თანამეგობრობის საშუალებით შეუძლია.

"სამწუხაროდ, ჩვენს სახელმწიფოს ერთადერთი, რაც ამ ეტაპზე შეუძლია ეს არის რეაგირება მოახდინოს საერთაშორისო თანამეგობრობის მეშვეობით და ზეწოლა მოახდინოს რუსეთის ფედერაციაზე, საოკუპაციო რეჟიმზე. სხვა ბერკეტი, სამწუხაროდ, ამ ეტაპისთვის სახელმწიფოს არ გააჩნია", — განაცხადა დავითულიანმა.

სახელმწიფოს უსაფრთხოების სამსახურის ინფორმაციით, 18 იანვარს, დაახლოებით 20:30 საათზე, ზუგდიდის მუნიციპალიტეტის სოფ. ხურჩას მიმდებარედ, საქართველოს ცენტრალური ხელისუფლების კონტროლირებად ტერიტორიაზე, რუსეთის საოკუპაციო ძალების წარმომადგენლებმა უკანონოდ დააკავეს საქართველოს 3 მოქალაქე.