რუსეთის საგარეო საქმეთა მინისტრის, სერგეი ლავროვის განცხადებით, დასავლეთის კრიტიკა ალექსეი ნავალნის დაკავებაზე არის "განვითარების ლიბერალური მოდელის კრიზისიდან" ყურადღების გადატანა. ამის შესახებ მან პრესკონფერენციაზე განაცხადა.

"ჩვენ ვნახეთ, როგორ ჩაეჭიდნენ გუშინდელ ამბავს რუსეთში ნავალნის დაბრუნებასთან დაკავშირებით. პირდაპირ იგრძნობა, როგორი სიხარულით მოდის ერთნაირი კომენტარები. სიხარულით, რადგან, როგორც ჩანს საშუალებას აძლევს დასავლელ პოლიტიკოსებს იფიქრონ, რომ ასე შეუძლიათ ყურადღება გადაიტანონ იმ ღრმა კრიზისიდან, რომელშიც განვითარების ლიბერალური მოდელი მოხვდა", — აღნიშნა ლავროვმა.

17 იანვარს გერმანიიდან მოსკოვში დაბრუნებული რუსი ოპოზიციონერი, ალექსეი ნავალნი აეროპორტში დააკავეს. სასჯელის აღსრულების ფედერალურ ბიუროს განცხადებით, ნავალნი 2020 წლის 29 დეკემბრიდან გამოსაცდელი ვადის მრავალჯერ დარღვევის გამო ძებნაშია.

ნავალნი აგვისტოში მოწამლეს. თავდაპირველად ის ომსკის კლინიკაში მკურნალობდა, თუმცა ორი დღის შემდეგ, ოჯახის მოთხოვნით გერმანიაში, შარიტეს კლინიკაში გადაიყვანეს. რამდენიმე ქვეყნის ლაბორატორიამ დაადასტურა, რომ ოპოზიციონერი ნოვიჩოკის ჯგუფის საწამლავით მოწამლეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რათა ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.