გერმანიის კანცლერის, ანგელა მერკელის განცხადებით, twitter-ის მიერ ამერიკის პრეზიდენტის, დონალდ ტრამპის ანგარიშით განუსაზღვრელი დროით დაბლოკვა "პრობლემატური საკითხია".

მერკელის პრესპიკერის განცხადებით, აზრის გამოხატვის თავისუფლებას ფუნდამენტური მნიშვნელობა აქვს.

კანცლერის ეთანხმება ტრამპის არამართებული პოსტების შესახებ გარკვეული ზომების მიღებას, თუმცა ამბობს, რომ ნებისმიერი შეზღუდვა გამოხატვის თავისუფლებაზე უნდა იყოს განსაზღვრული კანონის და არა კერძო კომპანიების მიერ.

ძალადობის შემდგომი წაქეზების რისკის გამო, ამერიკის მოქმედ პრეზიდენტ დონალდ ტრამპს ანგარიში ტვიტერმა სამუდამოდ დაუბლოკა. კომპანიაში განაცხადეს, რომ გადაწყვეტილება მისი ბოლოდროინდელი ტვიტების განხილვის შემდეგ მიიღეს.

BBC-ის ცნობით, კანონმდებელთა და ცნობილ ადამიანთა ნაწილი წლებია, სოციალურ ქსელში ტრამპის ანგარიშის სამუდამოდ აკრძალვას ითხოვდა.

სამომხმარებლო წესების დარღვევისა და ძალადობის წამახალისებელი ტვიტების გამო, აშშ-ის მოქმედი პრეზიდენტის, დონალდ ტრამპის ტვიტერის ანგარიში 12 საათით, 7 იანვარსაც, დაიბლოკა. კომპანიაში განაცხადეს, თუ ტრამპი აღნიშნულ პოსტებს არ წაშლიდა, ანგარიშს განმეორებით დაბლოკავდნენ.

ეს პირველი ე.წ. სანქცია არ არის, რომელიც Twitter-მა დღეს ტრამპის წინააღმდეგ გამოიყენა. ამას წინ უძღოდა პოსტების მონიშვნა ძალადობის რისკის შემცველად, ინტერაქციის შეზღუდვა და მათი წაშლა. იგივე პოსტები გაქრა ტრამპის Facebook-ის ანგარიშიდანაც.

წაშლილი პოსტებიდან ერთ-ერთი ტრამპი მხარდამჭერებს, მათ შორის კაპიტოლიუმში შეჭრილებს "განსაკუთრებულს" უწოდებდა და ამბობდა, რომ ისინი უყვარს. მეორეში კი მათ საქციელს ამართლებდა და აცხადებდა, რომ ასე იქცევიან ადამიანები, რომლებსაც არჩევნები წაართვეს. ტრამპის ეს განცხადებები ძალადობის წახალისებად შეფასდა.

მოგვიანებით ცნობილი გახდა, რომ დონალდ ტრამპის ანგარიშები დაიბლოკა ფეისბუქსა და ინსტაგრამზეც.

6 იანვარს ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

არეულობის შედეგად დაშავდა პოლიციის სულ მცირე 14 თანამშრომელი. ბოლო მონაცემებით, დაკავებულია 52 პირი: 4 ლიცენზიის გარეშე იარაღის ტარებისთვის, 1 აკრძალული იარაღის ტარებისთვის, 47 კი კომენდანტის საათის დარღვევისთვის.

ტრამპის მხარდამჭერების მიერ ორგანიზებული არეულობის მიუხედავად, 7 იანვარს, აშშ-ს კონგრესმა საპრეზიდენტო არჩევნებში დემოკრატი ჯო ბაიდენის გამარჯვება ოფიციალურად დაამტკიცა.

სენატმა და წარმომადგენელთა პალატამ უარყვეს მოთხოვნები ჯორჯიასა და პენსილვანიაში ბაიდენისთვის ხმების გაუქმებასთან დაკავშირებით. რესპუბლიკური პარტიის წარმომადგენლები ასევე აპროტესტებდნენ არიზონას, ნევადისა და მიჩიგანის შედეგებსაც.

საბოლოოდ კონგრესმა ამომრჩეველთა კოლეგიის ხმების დაამტკიცა, რომელიც ასე გადანაწილდა:

• ჯო ბაიდენი — 306;
• დონალდ ტრამპი — 232.

არჩეული პრეზიდენტი, ჯო ბაიდენი და არჩეული ვიცე-პრეზიდენტი, კამალა ჰარისი უფლებამოსილებას 20 იანვარს, ინაუგურაციის შემდეგ შეუდგებიან. მანამდე კი ხელისუფლების გადაბარების პროცესი იქნება.