ევროპული საქართველოს ერთ-ერთი ლიდერი, გიგი უგულავა ქართული ოცნების ამომრჩევლებს მიმართავს. მისი თქმით, ივანიშვილმა საკუთარ ამომრჩეველს უღალატა.

" ... თქვენ, ვინც ივანიშვილს მიეცით ხმა , ივანიშვილმა გიღალატათ, დაგტოვათ პანდემიის წინაშე, ამ ხროვის წინაშე, რომელსაც არასდროს არაფერი არ გაუკეთებია და 8 წელიწადშიც კი ვერაფერი ისწავლა, თქვენ ივანიშვილმა გაგწირათ, მოგატყუათ და დაგიტოვათ ეს ერთპარტიული პარლამენტი", — განაცხადა უგულავამ.

მისი თქმით, ადამიანებმა, ვინც საპარლამენტო არჩევნებში 41 ნომერი შემოხაზა, ხმა არა ქართული ოცნების ცალკეულ წარმომადგენლებს, არამედ კონკრეტულად ბიძინა ივანიშვილს მისცა.

"მინდა ვუთხრა ქართული ოცნების ამომრჩევლებს, ჩვენ ბევრ რამეში ვერ ვთანხმდებით, განსხვავებული პოზიცია გვაქვს, მაგრამ. ერთი რამე არის უდაო: თქვენ, ვინც 31 ოქტომბერს 41 ნომერი შემოხაზეთ, ის არ შემოგიხაზავთ კობახიძის, ელისო ბოლქვაძის თუ ქართული ოცნების რომელიმე ახალი თუ ძველი სახის გამო. თქვენ 41 შემოხაზეთ ბიძინა ივანიშვილის გამო. შესაბამისად, ამ პარლამენტს, რომელიც დღეს ერთპარტიულია, ისედაც ლეგიტიმაციის პრობლემები აქვს და თუნდაც მოჩვენებითი თუ რეალური თანამდებობიდან წასვლის შემდეგ, ლეგიტიმაციის პრობლემა კიდევ ათჯერ თუ ასჯერ უფრო მწვავედ დგება", — განაცხადა გიგი უგულავამ.

პოლიტიკაში მეორედ მოსვლის შემდეგ ქართული ოცნების თავმჯდომარე, ბიძინა ივანიშვილი ამბობს, რომ პოლიტიკიდან მეორედ მიდის. ამის შესახებ მან ფეისბუქში გამოქვეყნებულ საჯარო წერილში განაცხადა.

გაიგეთ მეტი: