მთავრობა კორონავირუსთან დაკავშირებულ ყველა შეზღუდვას პირველ თებერვლამდე ახანგრძლივებს, მათ შორის, შეზღუდვას საზოგადოებრივ ტრანსპორტსა და არასურსათო მაღაზიებზე. ამის შესახებ საკოორდინაციო საბჭოს შემდეგ ეკონომიკისა და მდგრადი განვითარების მინისტრმა, ნათია თურნავამ განაცხადა.

"ჩვენ ვიმსჯელეთ დღეს და მივიღეთ გადაწყვეტილება, რომ პირველ თებერვლამდე შევინარჩუნოთ ის რეჟიმი, რაც დღეს არსებობს, ასე ვთქვათ, წერტილოვანი შეზღუდვების. ჩვენ ამოცანაა, პირველ თებერვლამდე დარჩენილი 2-3 კვირა გამოვიყენოთ იმისთვის, რომ ძალიან აქტიური კომუნიკაცია გვქონდეს ბიზნესებთან და მოვემზადოთ პირველი თებერვლიდან უფრო უსაფრთხო გახსნისთვის, თუნდაც რაც შეეხება ვაჭრობისა და ტრანსპორტის სექტორს", — განაცხადა თურნავამ.

მისივე თქმით, ყოველდღიურ რეჟიმში აქვთ შეხვედრა სავაჭრო სფეროს წარმომადგენლებთან, რათა დარწმუნდნენ, რომ ყველა სტანდარტი იქნება დაცული.

"სხვათაშორის, ახალი წლის წინა პერიოდმა გვაჩვენა, რომ ვაჭრობის ინდუსტრია საკმაოდ დიდი პასუხისმგებლობით ეკიდება ამ სტანდარტებს. შეიძლება დამატებითი მოთხოვნები იყოს, რაზეც ჩვენ მათთან შევჯერდებით და ეს ყველაფერი მოასწავებს უფრო უსაფრთხო გახსნის პერიოდს, რაც, ჩვენ დიდი იმედი გვაქვს, თებერვლიდან დაიწყება", — თქვა თურნავამ.

მან ასევე აღნიშნა, რომ მუნიციპალური ტრანსპორტი და არასასურსათო ვაჭრობა მთავრობის პრიორიტეტია და სწორედ ამ მიმართულებით მუშაობენ ახლა, რომ ახალი სტანდარტები შემოიღონ. თურნავას თქმით, იმისთვის, რომ შეზღუდვები მოიხსნას, უნდა იყოს დაღმასვლა ყოველდღიური ინფიცირების სტატისტიკაში და სტაბილიზაციასა და პროგრესს არაფერი დაემუქროს.

კორონავირუსის შემთხვევების ზრდის გამო, ნოემბრის ბოლოდან ქვეყანაში შეზღუდულია საქალაქთაშორისო ტრანსპორტი, ასევე, დიდ ქალაქებში არ მუშაობას მუნიციპალური ტრანსპორტი. შეზღუდულია ზოგიერთი ბიზნესსაქმიანობა: მათ შორის დახურულია სავაჭრო ცენტრები, ბარ-რესტორნები და მაღაზიები. მუშაობას სასურსათო, ზოომაღაზიები და პირველადი დანიშნულების მაღაზიები აგრძელებენ.