გიორგი ლაფერაშვილი ტელეკომპანია ფორმულას საინფორმაციო სამსახურს აღარ უხელმძღვანელებს. როგორც მან On.ge-ს უთხრა, ის არხზე რჩება და თოქ-შოუების მიმართულებით გააგრძელებს მუშაობას.

"ახლაც ფორმულაზე ვარ. ვგეგმავ ახალ თოქ-შოუებს, რომელიც ორშაბათიდან უნდა გავიდეს ეთერში. აქამდე არ გვქონდა თოქ-შოუების ერთიანი ხაზი, ძალიან ბევრი თოქ-შოუა და გადავერთე ამ მიმართულებაზე", — აღნიშნა ლაფერაშვილმა.

რაც შეეხება საინფორმაციო სამსახურის ვაკანტურ თანამდებობას, ლაფერაშვილმა აღნიშნა, რომ ორშაბათს მეტი დეტალი იქნება ცნობილი:

"მე როგორც ვიცი, ბორდი კეთდება, რომლის წევრიც მე ვიქნები, ჯერ დეტალები არ ვიცი. ორშაბათს უფრო მეტი გვეცოდინება ამ თემაზე".

გიორგი ლაფერაშვილი ფორმულაში არხის დაფუძნების დღიდან, 2019 წლიდან მუშაობს. ის წლების განმავლობაში რუსთავი 2-ზე მუშაობდა, თუმცა ტელევიზიის ქიბარ ხალვაშისთვის გადაცემის შემდეგ, სხვა თანამშრომლებთან ერთად არხი დატოვა.