ექსპრეზიდენტის, მიხეილ სააკაშვილის განცხადებით, ქართული საბალეტო დასის ხელმძღვანელის, ნინო ანანიაშვილის გადაწყვეტილებას, რუსულ ბალეტთან თანამშრომლობის შესახებ, გამართლება არ აქვს. სააკაშვილი ამბობს, რომ ეს ანანიაშვილის პირადია რჩევანია, მაგრამ მას არ მოსწონს.

"საქართველოს უმნიშვნელოვანესი ნაწილი აქვს ოკუპირებული რუსეთს. როდესაც საფრანგეთი ჰქონდა ოკუპირებული გერმანიას ედიტ პიაფს რომ ეთქვა, წავალ ახლა ბერლინში, ბერლინის კაბარეებში უნდა გამოვიდე, უნდა გავართო კარგად გერმანელი ოფიცრები, მერე რა ომი კი გვქონდა, შემოვიდნენ, მაგრამ... მე არ ვადარებ, რადგან ნინო ანანიაშვილი არის გენიალური ბალერინა.

მე არასდროს არ დამავიწყდება მისი, მაგალითად გამოსამშვიდობებელი კონცერტი ნიუ იორკის სიტი ბალეტში, სადაც 50 წუთი ფეხზე ამდგარი უკრავდა ხალხი ტაშს. ეს ყველაფერი ასეა, ეს არის პირადი არჩევანი, მაგრამ რომ გითხრათ რომ მომწონს-მეთქი, ამას გამართლება არ აქვს", — განაცხადა მან მთავარი არხის ეთერში.

ანანიაშვილი სააკაშვილის ოჯახის ახლობელი და მისი ყოფილი თანაგუნდელისა და ენმ-ს ექსთავმჯდომარის, გრიგოლ ვაშაძის ცოლია. როგორც ბალერინა ამბობს, მისი გადაწყვეტილება ვაშაძეს არ მოეწონა, თუმცა მათი სფეროები გაყოფილია და ის არასდროს ერევა პოლიტიკაში.

6 იანვარს ცნობილი გახდა, რომ ანანიაშვილი რუსეთში, ნოვოსიბირსკის საბალეტო დასს უხელმძღვანელებს.

ანანიაშვილი გადაწყვეტილებას პანდემიის გამო შექმნილი ფინანსური მდგომარეობით ხსნის. ის აცხადებს, რომ რუსულთან ერთად ქართულ დასსაც უხელმძღვანელებს და მსგავსი თანამშრომლობა ბალეტის სფეროში "ჩვეულებრივი რამ არის".