ქართული საბალეტო დასის ხელმძღვანელი, ნინო ანანიაშვილი რუსეთში, ნოვოსიბირსკის საბალეტო დასს უხელმძღვანელებს. ამის შესახებ მან რადიო თავისუფლებასთან ინტერვიუში ისაუბრა.

ანანიაშვილი გადაწყვეტილებას პანდემიის გამო შექმნილი ფინანსური მდგომარეობით ხსნის. ის აცხადებს, რომ რუსულთან ერთად ქართულ დასსაც უხელმძღვანელებს და მსგავსი თანამშრომლობა ბალეტის სფეროში "ჩვეულებრივი რამ არის".

"ყველაზე დიდი სირთულეები ბალეტის მსახიობებს დაატყდათ თავს. მარტში ერთი წელი გახდება რაც დაკეტილები ვართ და ისევ არ ვიცით, გავიხსნებით თუ არა. შვიდი გასტროლი გაგვიუქმდა. ყველა დადგმამ შემდეგ წელში გადაიწია, მაგრამ რა იქნება, ეგეც გაურკვეველია. არც ის ვიცით, როგორი ფინანსური პრობლემები გველის წინ, მაგრამ ნამდვილად რომ გვექნება, ეს ცხადია. ამიტომ გამოსავალი ვიპოვე ასეთ თანამშრომლობაში", — განაცხადა მან.

ბალერინა ამბობს, რომ მისი ქმარი, გრიგოლ ვაშაძე აღნიშნული გადაწყვეტილებით კმაყოფილი არ არის.

"ძალიან რთული გადაწყვეტილება იყო და სულ არ გახარებია. ჯერ ერთი იმიტომ, რომ სახლში ნაკლებად ვიქნები. უბრალოდ, ჩვენ გაყოფილი გვაქვს სფეროები — მე არასოდეს ვერევი პოლიტიკაში, ის თავად იღებს თავის პოლიტიკურ გადაწყვეტილებებს და ხანდახან არც ვარ საქმის კურსში", — აცხადებს ანანიაშვილი.

რაც შეეხება საზოგადოების რეაქციას, ანანიაშვილი ამბობს, რომ კრიტიკას ელის, თუმცა ამ ყველაფერს პოლიტიკური სიტუაციის მიღმა განიხილავს.

"მე მოველი, რომ შემოტევა იქნება პირადად ჩემი მისამართით, მაგრამ მზად ვარ. მე ვფიქრობ, რომ არ უნდა იყოს ხელოვნება ასეთი გაპოლიტიზირებული. გერმანიასთანაც გვქნდა ომი და ათასობით ჩვენი მოქალაქე დაიღუპა, მაგრამ ეს ხომ არ ნიშნავს, რომ დღეს არ ვემეგობროთ მათ", — ამბობს ის.

ანანიაშვილის თქმით, ეს თანამდებობა მას ნოვოსიბირსკის თეატრის ხელმძღვანელობამ შესთავაზა და ჯერ ოფიციალურად დანიშნული არ არის.

დღის განმავლობაში On.ge-მ არაერთხელ სცადა დაკავშირება ანანიაშვილთან დამატებითი ინფორმაციის მისაღებად, თუმცა ის სატელეფონო ზარებსა და შეტყობინებებს არ პასუხობს.