ხანძრის შედეგად დაზარალებულებს სავაჭრო ცენტრ ბავშვთა სამყაროს ოქროს ბირჟის საცავებში შესვლის ნება დართეს და უკვე შეუძლიათ რომ ძვირფასეულობა გამომძიებლებთან ერთად აღწერონ.

საცავებში გამომძიებლებთან ერთად ოთხი-ხუთი ადამიანი შედის. საგანგებო სიტუაციების მართვის სააგენტოს დირექტორის ზვიად ქაწაშვილის განცხადებით, ცეცხლის სრულ ლიკვიდაციამდე ჯერ კიდევ დარჩა ჩასატარებელი სამუშაოები, რადგან მისივე თქმით, შენობის ჩამონგრევის საფრთხის გამო, მეხანძრეები შიგნით ვერ შედიან და გარედან ცდილობენ კერების ჩაქრობას.

სავაჭრო ცენტრ ბავშვთა სამყაროში 30 იანვარს, გამთენიისას გაჩენილი ხანძრის შედეგად სრულიად განადგურდა შენობა, დაზარალდა ათობით მოვაჭრე, რომლებსაც სავაჭრო ცენტრში და მის მიმდებარე ბაზრობებზე ტანსაცმლის, ავეჯის, ოქრო-ვერცხლის მაღაზიები ჰქონდათ.

დამწვარი მილიონები - ფოტორეპორტაჟი ბავშვთა სამყაროს ტერიტორიიდან