საქართველოს ფინანსთა სამინისტროს საგამოძიებო სამსახურმა ალკოჰოლური სასმელის აქციზური მარკის გარეშე რეალიზაციის ბრალდებით, საქართველოს ერთი მოქალაქე დააკავა. ამის შესახებ ინფორმაციას საგამოძიებო სამსახურის პრესსამსახური ავრცელებს.

საგამოძიებო უწყების ინფორმაციით, ჩატარებული ოპერატიულ-სამძებრო და საგამოძიებო მოქმედებების შედეგად დადგინდა, რომ ბრალდებულს საქართველოს ტერიტორიაზე აქციზური მარკის სავალდებულო დართვას დაქვემდებარებული ბრენდირებული ალკოჰოლური სასმელის - david- ის აქციზური მარკის გარეშე ყიდდა. საგამოძიებო სამსახურის მიერ ნივთმტკიცების სახით ამოღებულია 700 ერთეული უაქციზო ალკოჰოლური სასმელი.

საქმეზე გამოძიება საქართველოს სისხლის სამართლის კოდექსის მე-200 მუხლის II ნაწილის „ბ“ და „გ“ ქვეპუნქტებით მიმდინარეობს. კოდექსის მე-200 მუხლის მიხედვით, აქციზური მარკის სავალდებულო დართვას დაქვემდებარებული საქონლის მარკის გარეშე გამოშვება, შენახვა, რეალიზაცია ან გადაზიდვა ისჯება ჯარიმით ან თავისუფლების აღკვეთით ვადით ორიდან ოთხ წლამდე. ამ დარღვევისთვის სისხლისსამართლებრივი პასუხისმგებლობა დგება, როდესაც საქონლის ღირებულება აღემატება ორი ათას ლარს.

ამ შემთხვევაში გამოძიება ბრალდებულს დიდი ოდენობითა და ჯგუფის მიერ დანაშაულის ჩადენას ედავება, რაც ისჯება თავისუფლების აღკვეთით ვადით ოთხიდან ექვს წლამდე. იგივე ქმედება განსაკუთრებით დიდი ოდენობის შემთხვევაში ისჯება თავისუფლების აღკვეთით ვადით ექვსიდან რვა წლამდე.