განათლების კომიტეტის თავმჯდომარემ, თეა წულუკიანმა მიხეილ დაუშვილის ინიციატივაზე, რომელიც შრომის კოდექსში მუხლების ამოღებას ეხება, განაცხადა, რომ ეს არა დასქმებულის ინტერესებს, არამედ კერძო ბიზნესის ინტერესებს ემსახურება.

"თქვენ ბიზნესომბუდსმენი ხართ დღეს ამ ტრიბუნასთან თუ დეპუტატი? ამ ნორმის ამოშლა არის უზარმაზარი უკან გადადგმული ნაბიჯი შრომით ურთიერთობებში და კერძო სექტორში, თორემ, არცერთი სამინისტრო, არც ეს პარლამენტი და არცერთი საჯარო დაწესებულება არ იკადრებს და ვეღარ იკადრებს შრომის ურთიერთობებში იმას, რასაც კადრულობს, ხოლმე, კერძო ბიზნესი — მცირეწლოვანი ბავშვი დედასთან მიმართებით, ჰომოსექსუალ ადამიანებთან მიმართებით, ფეხმძიმე ქალთან მიმართებით, შშმ პირთან მიმართებით. ამ ორი ნორმით, ერთი ზოგადია და მეორე არის უფრო კონკრეტული, ამით დასაქმებულ პირს აქვს უფრო მეტი დაცულობა, თქვენ ამას ეძახეთ ტექნიკური ხარვეზი. ბიზნესს ნამდვილად გაუხარდება, თუ ამას წავშლით, მაგრამ მათ სხვანაირად უნდა შევუწყოთ ხელი, რომ აყვავდნენ, და არა იმით, რომ ფეხმძიმე ქალი არ მიუშვან სამსახურში იმიტომ, რომ ცხრა თვე მერე ხელფასი უნდა უხადონ, ამას ემსახურება სხვას არაფერს", — განაცხადა თეა წულუკიანმა.

ქართული ოცნების დეპუტატმა, მიხეილ დაუშვილმა პარლამენტის პლენარულ სხდომაზე განაცხადა, რომ შრომის კოდექსში არსებული რამდენიმე მუხლი ერთი და იმავე შინაარსისაა, ამიტომ უნდა ამოიღონ, ხოლო ნაწილი უკეთ უნდა განიმარტოს.