ქართული ოცნების დეპუტატის, ეკა სეფაშვილის განცხადებით, პანდემია არ ნიშნავს, რომ "უკვე ყველაფერი გვეპატიება". ასე ეხმაურება იგი პარლამენტის წევრის, ბექა დავითულიანის ინიციატივას, რომლის თანახმადაც, უკანონოდ განთავსებული ჯიხურების მფლობელებს ჯარიმები უნდა ჩამოეწეროთ.

"უკანონოდ თუ დაიდგა რატომ არ უნდა დაჯარიმდეს? ოდესმე ხომ უნდა მოეღოს ბოლო ამ უკანონო ჩადგმებს? მაგრამ თუ პანდემიის საჭიროებებიდან გამომდინარე დაიდგა ეს ჯიხური, ვადის გაგრძელება არ მოუთხოვიათ და ამის გამო დაეკისრათ ჯარიმა, ამ გარემოებასთან დაკავშირებით კვლავ კითხვა მაქვს — ნებართვის მოთხოვნას არ უნდა დამატებითი ფინანსური რესურსები, ეს არის უბრალოდ განცხადების დაწერა — თუ ამაზეა საუბარი, ეს უპასუხისმგებლობა რატომ უნდა ვაპატიოთ? რა თქმა უნდა, უნდა დაისაჯონ ასეთი პირები, რადგან კანონის უზენაესობა ერთხელ და სამუდამოდ დაცული უნდა იყოს", — განაცხადა მან.

სწორედ შეღავათებსა და ჯარიმის გადაუხდელობაზე საუბრისას აღნიშნა დეპუტატმა, რომ მოულოდნელად "თავსდატეხილი" პანდემია გასაგებია, თუმცა მისი თქმით, როდესაც უკვე პანდემიის პირობებში ვცხოვრობთ და ამ პირობებში გვიწევს მუშაობა, "არ ნიშნავს რომ უკვე ყველაფერი გვეპატიება".

ბექა დავითულიანმა აღნიშნული ინიციატივა დღეს პარლამენტის რიგგარეშე სესიის პლენარული სხდომაზე წამოაყენა. მისი განცხადებით, პანდემიის გათვალისწინებით ჯიხურებისთვის გარკვეული შეღავათები უნდა დაწესდეს.

"საქმე ეხება თბილისში და რეგიონებში განთავსებულ ჯიხურებს, რომლებსაც დარღვეული აქვთ, მაგალითად, იჯარის გადახდის ვალდებულება პანდემიის პირობებში, ან ვიღაცამ დადგა უკანონოდ პანდემიის დროს და დაჯარიმდა ამის გამო, მათ არ ეხსნებათ ჯიხურების აღების პასუხისმგებლობა, ვალდებულები არიან აიღონ, მაგრამ თავისუფლდებიან ჯარიმისგან", — განაცხადა დავითულიანმა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.