კომუნიკაციების კომისიამ ტელეკომპანია ფორმულა ჩცდ-ს დღის ეთერში გასვლის გამო დააჯარიმა. ამის შესახებ კომუნიკაციის კომისიის წარმოამდგენლებმა დღეს იმსჯელეს.

საჩივარი კომისიაში თავდაპირველად მართლმადიდებელ მშობელთა კავშირმა შეიტანა. ისინი მოითხოვდნენ, რომ სერიალი ეთერიდან ჩახსნილიყო, გამომდინარე იქედან, რომ "თითქმის ყველა სერიაში არის შეურაცხმყოფელი ლექსიკა და გინება".

მმკ-ს განცხადება სერიალის სრულიად ჩახსნასთან დაკავშირებით არ დაკმაყოფილდა, თუმცა კომისიამ მიიღო გადაწყვეტილება, რომ სერიალის განმეორებით, დღის ეთერში გასვლისა და ასაკობრივი ნიშანდების წესების დარღვევით განთავსების გამო არხი დაეჯარიმებინა. თანხის ოდენობა 2 500 ლარი იქნება.

"დაჯარიმების საფუძველი სამაუწყებლო ბადეში არასრულწლოვნებისთვის შეუფერებელი პროგრამის შეუსაბამო დროს და ასაკობრივი ნიშანდების წესების დარღვევით განთავსება გახდა. ამას გარდა, ფორმულას დაევალა დაიცვას ბავშვის უფლებათა კოდექსი, მაუწყებლობის შესახებ საქართველოს კანონი და უზრუნველყოს სერიალ ჩემი ცოლის დაქალების ეთერში განთავსება მაუწყებლობის შესახებ საქართველოს კანონით დადგენილ დროს სათანადო ნიშანდებით, რათა მოზარდებზე მავნე ზეგავლენა არ მოახდინოს", — აცხადებენ კომისიაში.

საჩივრის საფუძველი, ქართული ოცნების ყოფილი დეპუტატისა და მე-9 მოწვევის პარლამენტის ადამიანის უფლებათა და სამოქალაქო ინტეგრაციის კომიტეტის თავმჯდომარის, სოფო კილაძის ინიცირებული კანონი გახდა. ეს არის სპეციალური კანონი, ბავშვთა უფლებათა კოდექსი, რომელიც დაადგენს საკანონმდებლო საფუძვლებს ბავშვთა უფლებების დასაცავად.