იუსტიციის მინისტრმა, გოჩა ლორთქიფანიძემ განაცხადა, რომ მისი ჰააგის მოსამართლედ დანიშვნის ინფორმაციამ ქართულ საზოგადოებაში "ძალიან დიდი აჟიოტაჟი" გამოიწვია იმასთან დაკავშირებით თუ როგორ შეუთავსებდა იგი იუსტიციის მინისტრობას ახალ თანამდებობას. ლორთქიფანიძის განმარტებით, "შესათავსებელი" არაფერია და ყველაფერი ეს არის "ქარიშხალი ჭიქაში".

"რეალურად არც არსებობს შეთავსების საკითხი. იმდენად, რამდენადაც არა მარტო მე, არამედ ნებისმიერი, ვინც აირჩიეს ისინი მიეკუთვნებიან კატეგორიას, რაც არის არჩეული მოსამართლე. სანამ გახდები მოსამართლე, არის რამდენიმე თვე, ვადა, რისი გასვლის შემდეგაც ოფიციალურად უნდა შეუდგე მოვალეობების შესრულებას. ეს უკვე წყდება სასამართლოსთან ერთად. მათ შორის, რა თქმა უნდა, აღმოსავლეთ ევროპიდან, ჩეხმა მოსამართლემ უნდა ჩაამთავროს თავისი ვადა. ყველაფერი ამის შეჯერების შემდეგ, უკვე ფაქტობრივად, ცნობილი ხდება ის დრო და ეს არის, რეალურად, რამდენიმე თვე", — განაცხადა მან ტელეკომპანია იმედის ეთერში.

საქართველოს იუსტიციის მინისტრის ყოფილი მოადგილე და ახლა უკვე მინისტრი გოჩა ლორთქიფანიძე ჰააგაში სისხლის სამართლის საერთაშორისო სასამართლოს მოსამართლედ აირჩიეს.