"თუ ის იქნება ჯანმრთელობის მსოფლიო ორგანიზაციის მიერ აღიარებული, რატომაც არა", — ასე პასუხობს დაავადებათა კონტროლის ცენტრის დირექტორის მოადგილე, პაატა იმნაძე კითხვას, შესაძლოა თუ არა, საქართველომ განიხილოს რუსული ვაქცინის შემოტანა. ამის შესახებ მან რუსთავი 2-ის ეთერში ისაუბრა.

იმნაძის თქმით, ჯერ ეს საკითხი დღის წესრიგში არ დგას და WHO სხვა ვაქცინებს განიხილავს: ასტრაზენეკა, სინოვაკი. მისივე თქმით, სინოვაკის ჩინური ვაქცინით მსოფლიოში ყველაზე მეტი, მილიონზე მეტი ადამიანია აცრილი.

დღეს, 23 დეკემბერს ჯანდაცვის მინისტრმა, ეკატერინე ტიკარაძემ განაცხადა, რომ რუსული ვაქცინის მომხმარებელი, თუ ის მსოფლიომ აღიარა, არა მხოლოდ საქართველო, არამედ სხვა ქვეყნებიც შეიძლება გახნდნენ.

ბევრ სხვა ქვეყანასთან ერთად საქართველო ახლა კორონავირუსზე ვაქცინის მომლოდინეთა რიგშია. სხვადასხვქ ქვეყნის მარეგულირებელმა ორგანოებმა დაშვება მისცეს Pfizer-ის ვაქცინას და ვაქცინაცია დაიწყო დიდ ბრიტანეთში, აშშ-ში, კანადაში, ისრაელში. ამასთან, ევროკავშირის სამედიცინო რეგულატორმა 27 ქვეყანაში Pfizer-ის ვაქცინის გამოყენების რეკომენდაცია გასცა.

როგორც ჯანდაცის სისტემის წარმომადგენლები აცხადებენ, კოვაქსპლატფორმის ფარგლებში ვაქცინას საქართველოში გაზაფხულისთვის ელოდებიან. საუბარია 1 400 000 დოზაზე, რომელიც 700 000 მოქალაქისთვის არის გათვალისწინებული.