"კრიტიკული შეკითხვები არ ჰქონდათო. ერთმა ისიც გააკრიტიკა, რომ შეკითხვა გეთაყვათი იწყებოდაო. იმათ კრიტიკა ჰგონიათ, როცა დედის გინებით იწყებ", — ასე გამოეხმაურა ქართული ოცნების დეპუტატი ლადო კახაძე ოპოზიციას, სადაც განაცხადეს, რომ ერთპარტიულ პარლამენტში მინისტრობის კანდიდატებს კრიტიკული კითხვები არ დაუსვეს.

"იქ იყო მითითებები, სად არის პრობლემები, ამ პრობლემების აღმოფხვრის გზები", — განაცხადა მან.

მისი თქმით, კრიტიკა იყო, როცა მათ "ჯიბის ხარჯზე" გააკეთეს აქცენტი და იკითხეს, რატომ არ დაეტყო მოქალაქეების ჯიბეს ის, რომ სახელმწიფომ ამდენი ფული ჩადო ჯანმრთელობის სისტემაში. მისივე თქმით, უმწვავესი კრიტიკა იყო იმის თქმაც, რომ საქართველოში წამლების ფასი 400-500%-ით უფრო ძვირია.

ბოლო ორი დღის განმავლობაში პარლამენტის კომიტეტები მინისტრობის კანდიდატებს უსმენენ. ერთპარტიულ სხდომებზე, რომელსაც მხოლოდ ქართული ოცნების დეპუტატები ესწრებოდნენ მინისტრობის ყველა კანდიდატს მხარი დაუჭირეს.

ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.