ათწლეულების შემდეგ, ყველასთვის საყვარელი პრინცი აკიმი ამერიკაში ბრუნდება, რაც იმას ნიშნავს, რომ სულ მალე Coming To America-ს მეორე ნაწილს ვიხილავთ. ფილმის პრემიერა ამაზონის სტრიმინგ სერვისზე 2021 წლის 5 მარტს იგეგმება, მანამდე კი, სტუდიამ სიქველის პირველი ტრეილერით გაგვანებივრა.

32 წლის შემდეგ, ფილმში მთავარი ვარსკვლავები ბრუნდებიან. რა თქმა უნდა, მათ შორის არიან ედი მერფი და არსენიო ჰოლი. მერფი აწ უკვე მეფე აკიმის, ხოლო ჰოლი, მისი მეგობრისა და მრჩევლის, სემის როლს ასრულებს. ისინი ზამუნდადან ნიუ-იორკში ჩადიან, მას შემდეგ, რაც იგებენ, რომ აკიმს იქ დაკარგული მემკვიდრე ჰყავს.

როგორც ხედავთ, ფილმი ორიგინალი ვერსიისგან სიუჟეტით დიდად არ განსხვავდება. 1988 წლის კლასიკაში, პრინცი აკიმი ნიუ-იორკში საცოლის საპოვნელად ჩადიოდა.

ფილმის მეორე ნაწილში ასევე ბრუნდებიან ჯეიმს ერლ ჯონსი, შერი ჰედლი, ვანესა ბელ კალოვეი, ჯონ ემოსი და პოლ ბეითსი. ფილმის რეჟისორი კრეიგ ბრუერია. Coming To America-ს დასრულებული ვერსია ამაზონმა 2020 წლის შემოდგომაზე Paramount-სგან 125 მილიონ დოლარად შეიძინა.