თავდაცვის მინისტრობის კანდიდატის, ირაკლი ღარიბაშვილის განცხადებით, თავდაცვის სამინისტროს არსებული ბიუჯეტი სათანადოდ ვერ პასუხობს გამოწვევებს, რომლებიc ქვეყნის წინაშე დგას. ის იმედოვნებს, რომ 2022 წლიდან თავდაცვის სამინისტრო მეტ ყურადღებას დაუთმობს თანამედროვე შეიარაღების შესყიდვებს.

"ჩვენ უნდა დავიწყოთ თავდაცვის ბიუჯეტის გაზრდაზე აქტიური მუშაობა. ის ბიუჯეტი, რომელიც დღეს ჩვენ სამინისტროს აქვს, არ არის საკმარისი. ვერ პასუხობს სათანადოდ იმ მოთხოვნებს, ასე რომ ვთქვათ, იმ გამოწვევებს, პრიორიტეტებს, რომლებიც ჩვენი ქვეყნის წინაშე დგას. აქედან გამომდინარე, მე მესმის ძალიან კარგად, რომ ქვეყანაში პანდემიაა და მთავრობას უწევს ბევრი პრობლემის, მათ შორის ჩვენი მოსახლეობის სოციალურ-ეკონომიკური პრობლემის გადაჭრა, მაგრამ იმედი ვიქონიოთ, რომ 2022 წლიდან კიდევ უფრო გაუმჯობესდება მდგომარეობა და ამის შემდეგ ჩვენ მოგვეცემა საშუალება, რომ უფრო მეტი ყურადღება დავუთმოთ თანამედროვე შეიარაღების მიმართულებით შესყიდვებს", — აცხადებს ღარიბაშვილი.

პარლამენტში სიტყვით გამოსვლისას მანვე განაცხადა, რომ 2021 წელს ჯაველინის დამატებითი პარტიის შეძენა იგეგმება.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.