China Rescue Dogs ცხოველებზე ზრუნვის ორგანიზაციაა, რომელიც ჩინეთში ძაღლის ხორცით ვაჭრობის მსხვერპლი ცხოველების გადარჩენას და რეაბილიტაციას ისახავს მიზნად. მისი ინფორმაციით, პარასკევს 29 ცუგა გადააფრინეს ნიუ-იორკში.

ისინი ხორცით ვაჭრობის რისკისგან დაიხსნეს და აშშ-ში გადაიყვანეს და ნაწილმა მზრუნველი ოჯახი უკვე იპოვა. ადამიანებმა შეხვედრის გარეშე გადაწყვიტეს, რომ შინაურ ცხოველზე იზრუნებდნენ. ცხოველების ნაწილი ორგანიზაციის პარტნიორ თავშესაფრებში გადაიყვანეს, სადაც უსაფრთხო გარემოში აგრძელებენ რეაბილიტაციისა და სოციალიზაციის პროცესს.

"ახალი პატრონების ნაწილმა სამსახური დაკარგა, ოჯახის წევრი თუ შინაური ცხოველი. გადარჩენილი ძაღლები მათ ცხოვრებაში გამოჩნდნენ, რათა ახალ პატრონებს უპირობო სიყვარული აჩუქონ. ჩვენ მათ გადარჩენაზე ვზრუნავთ, მაგრამ ხშირად ეს ოთხფეხა მეგობრები ყველაზე დიდი გადამრჩენები არიან", — განაცხადა ჯილ სტიუარტმა, China Rescue Dogs-ის დამფუძნებელმა.

ფოტო: China Dog Rescue / People

პანდემიამ ორგანიზაციის მუშაობა გაართულა, იქამდე ორგანიზაციის წევრები პირადად სტუმრობდნენ ჩინეთს ძაღლების გადარჩენისა და ტრანსპორტირების მიზნით. შინაური ცხოველების აშშ-ში გადაყვანის პროცესს მოხალისეებიც აგვარებდნენ.

პანდემიის შეზღუდვებმა ცხოველების კომერციული ფრენების საშუალებით გადარჩენა და მოხალისეების მიერ მათი დამგზავრება შეუძლებელი გახადა, ერთადერთი გამოსავალი სატვირთო ვერტმფრენებია, რაც ბევრად ძვირი ჯდება. ერთი ძაღლის ტრანსპორტირების ხარჯები 3 500 დოლარამდეც კი აღწევს.

თუმცა ორგანიზაციას მუშაობა მაინც არ შეუწყვეტია. გარდა ამ გადარჩენის ოპერაციისა, რამდენიმე თვის წინ 100 ძაღლი დაიხსნეს. ორგანიზაცია თანხის შეგროვებას ცდილობს, რათა მეტი ცხოველის გადარჩენა და ტრანსპორტირება შეძლოს.

ფოტო: China Dog Rescue / People

"პანდემიის საყოველთაოდ გავრცელება ძაღლების გადარჩენის და მათი აშშ-ში ან კანადაში ტრანსპორტირების საჭიროებას არ ამცირებს", — განაცხადა რაიან მაკდონელმა, ორგანიზაციის ვიცეპრეზიდენტმა.

"საზოგადოების მხარდაჭერით უკეთ შევძლებთ ცხოველებზე ზრუნვას. ჩვენი მომდევნო გეგმა 150-ზე მეტი ძაღლის გადარჩენაა, რათა მზრუნველ ოჯახებში გააგრძელონ მშვიდი ცხოვრება", — დაამატა სტიუარტმა.

China Dog Rescue-ს დახმარება და ძაღლების გადარჩენა დონაციით თქვენც შეგიძლიათ, ამისთვის ორგანიზაციის ვებგვერდს უნდა ეწვიოთ.