ინფრასტრუქტურის მინისტრის მოვალეობის შემსრულებლის, მაია ცქიტიშვილის თქმით, ნოემბრიდან დაწესებული შეზღუდვების მოხსნაზე ჯერ კიდევ მიმდინარეობს მსჯელობა. ის აღნიშნავს, რომ შრომითი ინსპექცია ბიზნესის წარმომადგენლებთან ერთად მუშაობს იმ გარანტიების შექმნაზე, რაც უზრუნველყოფს ბიზნესისათვის დაწესებული სტანდარტების შესრულებას.

"ერთი მხრივ, ჩვენ ვაკვირდებით მოვლენებს, ვაანალიზებთ ძალიან ყურადღებით, გავდივართ კონსულტაციებს ეპიდემიოლოგებთან და სპეციალისტებთან. ბიზნესმა, პირველ რიგში, ძალიან კარგად იცის ყველა ის სტანდარტი, რომელიც თვეების განმავლობაში მოქმედებს, მაგრამ ხშირ შემთხვევაში არ არის დაცული. ეს არის რიგის კონტროლი, გარკვეულ ფართზე შესაბამისი რაოდენობის ადამიანების დაშვება და ა.შ. ახლა შრომითი ინსპექცია, ეკონომიკის სამინისტრო და ბიზნესის ასოციაციები ერთად მუშაობენ იმისთვის, რომ ჩვენც შეგვიქმნან იმის გარანტიები, რომ ეს წესები ამ შემთხვევაში მაინც იქნება დაცული. მიუხედავად იმისა, რომ საბოლოო გადაწვეტილება ამასთან დაკავშირებით მიღებული არაა, პარალელურად პროცესში ვიმყოფებით, ერთი მხრივ, ვემზადებით იმისთვის, რომ სავაჭრო ცენტრები გაიხსნას, მეორე მხრივ, ამ გადაწყვეტილებას მივიღებთ, როცა გვექნება სრულფასოვანი სურათი ყველა რისკთან დაკავშირებით", — ამბობს ცქიტიშვილი.

28 ნოემბრიდან, საკოორდინაციო საბჭოს გადაწყვეტილებით ქვეყანაში შეზღუდვები დაწესდა. იგი შეეხო გადაადგილების, მუნიციპალურ და საქალაქთაშორისო ტრანსპორტს, რესტორნებისა და ფიტნესცენტრების დახურვასა და სხვა. მათ, ასევე, დააანონსეს, რომ 24 დეკემბრიდან 2 იანვრის პერიოდში, ეს შეზღუდვები შემსუბუქდებოდა, თუმცა რა გადაწყვეტილებას მიიღებს საბჭო, ჯერჯერობით, უცნობია.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.